Во денешниот втор преглед на изборните активности на политичките партии и независните кандидати на локалните избори ги издвојуваме претставувањето на кандидатите на ВМРО ДПМНЕ, серијата маалски средби на СДСМ со граѓаните, претставувањето на кандидатка на независна листа на „Зелен хуман град“ и прес конференцијата на ОБСЕ/ОДИХР.
ПРЕТСТАВУВАЊА
ВМРО-ДПМНЕ денеска во Гази Баба ги претстави кандидатите за градоначалници на општина Гази Баба и на Градот Скопје, Бобан Стефковски и Данела Арсовска, кои пред граѓаните на општината ја претставија својата визија за Гази Баба и за Скопје. Кандидатите ги претстави партискиот шеф, Христијан Мицкоски.
Зелен Хуман Град (ЗХГ) на својата Фејсбук страница ја претстави кандидатката од независната листа за советници за Град Скопје, Андријана Папиќ Манчева.
Кандидатката на ЗХГ веќе неколку години професионално е ангажирана во ХЕРА – Асоцијација за здравствена едукација и истражување каде што сексуалната и репродуктивната слобода и права се врвен приоритет.
СДСМ денеска одржа серија маалски средби со граѓаните. Претседателот на Комисијата за спорт на СДСМ, Наумче Мојсовски, се сретна со граѓаните во општина Аеродром.
Пратеничката на СДСМ, Марија Ангелова, се сретна со жителите на Македонска Каменица. Членката на Централниот одбор на СДСМ, Јована Тренческа, беше на маалски средби во Кичево.
Претседателот на СДММ, Марко Михаилоски, беше со граѓаните на Тетово. Претседателката на Комисијата за животна средина Каја Шукова ќе се сретне со жители на Петровец.
Зоран Атанасов, Пеце Мирчевски и Зоран Китанов од СДСМ беа со граѓаните на Кривогаштани, Илинден и Росоман.
Потпретседателот на СДСМ Оливер Спасовски денеска во Кавадарци учествуваше на промоцијата на кандидатот за градоначалник на Кавадарци на коалицијата предводена од СДСМ, Горан Тодоров.
МОНИТОРИНГ
ОБСЕ/ОДИХР денеска одржа прес конференција во 15 часот и со тоа го означи почетокот на својата набљудувачка мисија за локалните избори закажани на 17 октомври. ОДИХР најави дека ќе вклучи 20 долгорочни и 250 краткорочни набљудувачи.
ЦИВИЛ спроведува мониторинг на локалните избори, преку своите долгорочни набљудувачи од почетокот на август. Воедно, медиумската платформа на организацијата секојдневно ја информира јавноста за сите важни аспекти на изборниот процес.
Во рамките на својот долгорочен изборен мониторинг, ЦИВИЛ и Редакцијата при медиумската платформа, редовно ги бележат настаните на различните учесници во изборната трка.
Организацијата неодамна ги повика политичките партии и независните кандидати редовно да ја известуваат организацијата и нејзината медиумска платформа за своите активности. Дел од учесниците во изборната трка сè уште не одговорија на повикот.
Д. Мишев
Претходното издание на изборната хроника „Алијансата за Албанците го објави кандидатот за општина Сарај, дуел меѓу СДСМ и ВМРО-ДПМНЕ, информација за објавите на ФБ страниците на независните“ беше објавено во 17 часот.
