Палестинците низ Појасот Газа, целиот опустошен од војната, вчера го одбележаа почетокот на еден од најважните празници во исламот со молитви пред уништените џамии и домови, со мала надеж дека војната со Израел наскоро ќе заврши.
Со голем дел од Газа во урнатини, мажите, жените и децата беа принудени да ги одржуваат традиционалните молитви за Курбан Бајрам на отворено, а со исклучително мали залихи храна, семејствата мораа да се снајдат со она што можеа да го соберат за тридневната гозба.
„Ова е најлошиот празник што го доживеал палестинскиот народ поради неправедната војна против палестинскиот народ“, рече Камел Емран откако присуствуваше на молитвите во јужниот град Кан Јунис. „Нема храна, нема брашно, нема засолниште, нема џамии, нема домови, нема душеци. … Условите се многу, многу сурови.“, пренесе Асошиетед Прес.
Најмалку 42 лица се убиени во израелски напади низ Газа за време на Курбан Бајрам, изјавија медицински извори за Ал Џазира, додека групата поддржана од САД која дистрибуира помош на палестинската територија соопшти дека сите нејзини центри се затворени до понатамошно известување.
Мртвите тела на 16 лица пристигнаа во болницата Насер во јужниот град Кан Јунис во петокот, соопштија локалните здравствени власти, додека уште 16 беа донесени во болницата Ал-Шифа во северна Газа, пет во Баптистичката болница Ал-Ахли во градот Газа и уште пет во болницата на мачениците Ал-Акса во Деир ел-Балах.
„Вака изгледа Курбан Бајрам овде во Газа“, рече Тарек Абу-Азум од Ал Џазира, известувајќи од Деир ел-Балах на првиот ден од муслиманскиот свет фестивал, кој обично се одбележува со радост. Оваа година денот „е многу мрачен потсетник за тоа што изгубиле и како се принудени да се справат со незамисливи околности“ среде бомбардирање, раселување и загуби, додаде тој.
Во меѓувреме, новинар кој беше ранет во израелски напад врз болницата Ахли во четврток им подлегна на повредите, со што бројот на новинари убиени во Газа од почетокот на војната се зголеми на 226, соопшти во петокот Канцеларијата за медиуми на Владата на Газа.
Во текот на изминатите две недели, речиси секојдневно избувнаа пукања во Појасот Газа во близина на нови центри каде што очајните Палестинци се упатуваат да собираат храна. Сведоците велат дека блиските израелски војници отвориле оган, а повеќе од 80 луѓе се убиени, според официјални лица од болницата во Газа.
Д. Тахири
