ЗОРАН ИВАНОВ
Баш фин повод за збор, два што бугарското МНР ја повикало македонската амбасадорка во Софија да ѝ потрие уши за некакви спорадични изјави на овдешни политичари кои бугарската страна ги оценила како некоректни, што е и факт, никој не вели дека нема вербални испади до степен на говор на омраза спрема одделни политички потези на источниот сосед предизвикани од неговата негаторска политика но, кажано и во оваа една реченица, толку ли е тапо тоа бугарско МНР што никако да сфати дека изворот на тој и таков овдешен вокабулар е реакција, е последица на најголемиот актуелен државен говор на омраза што го предизвикува и децениски го негуваат токму авторите на оваа дипломатска реакција на „столицата“, на таа и таквата цивилизациска некоректност токму на бугарското МНР и на политичките и историски рецидиви на тамошната држава со примитивните постапки на негирање на македонската нација, јазик, култура и традиција, постулати кои се одамна надминати во современата светска меѓународна комуникација и во дипломатската коресподенција па, оттука, за да не троши многу хартија на празни коминикеа, би било поарно актуелната бугарска политика, нејзиниот меѓународен посредник во ликот на бугарското МНР, да се воздржува од комични потези и соопштенија како погоре нотираното и, наместо тоа, конечно да се обиде да се осовремени, да се европеизира и да се цивилизира согласно елементарните меѓународни стандарди за да увиди дека во тој миг како меур од сапуница ќе се распрснат сите актуелни мотиви кои провоцираат а кои бугарската страна ги евидентира како говор на омраза.