Луцк, Украина, 20 јули 2026 – Во текот на минатата ноќ, мапите на мобилните апликации за воздушна опасност во Украина беа речиси целосно обоени во црвено, што укажуваше на широка закана врз повеќе региони. Украинските власти соопштија дека рускиот агресор изврши напад со две ракети воздух-земја Kh-59/69 и 94 дронови од различни типови во ноќта меѓу 19 и 20 јули. Силите за воздушна одбрана соборија 81 руски беспилотни летала.
Паралелно со нападите врз градовите, Украина објави дека агресорот извршил и смртоносен удар врз товарниот брод Golden Leo во близина на Одеса. Бродот, кој превезувал жито, бил погоден со крстосувачки ракети.
„рф останува главна закана за безбедноста на пловидбата во Црното Море. Бројот на загинати по нападот на рф на 19 јули врз трговскиот брод кај Одеса се зголеми на 10“, објави украинската амбасадорка Лариса Дир на социјалните мрежи денеска.
Според украинските информации, загинале членови на екипажот, има повредени и исчезнати, а меѓу загинатите бил и украински поморски пилот. Овој напад покажува дека цел на агресорот не се само украинските градови, туку и цивилната поморска и извозна инфраструктура, вклучително и транспортот на храна.
Ракетните напади на рф врз бродови со жито се системска политика за нарушување на глобалната прехранбена безбедност
Колегите од „Волинска газета“ во Луцк, од каде што се подготвува овој извештај, нѐ информираат дека нападите на рускиот агресор со дронови и наведувани авиобомби на 19 и 20 јули 2026 година предизвикаа сериозни штети и човечки жртви во неколку украински региони. За првпат со модернизирани авиобомби беше погоден Павлоград во Днипропетровската област, каде што беа повредени 13 лица, меѓу кои и едно 13-годишно девојче.
Во слични напади во Запорижја и Краматорск имаше две цивилни жртви и осум повредени лица, додека во Краматорск беа забележани шест директни погодоци во станбени квартови. Истовремено, нападите со дронови предизвикаа големи материјални штети на цивилна и индустриска инфраструктура, бензински пумпи и повеќекатница во Миколаив, како и приватна фабрика во П’лтава.
Воздушните тревоги низ Украина во ноќта кон 20 јули уште еднаш ја покажаа реалноста на животот под постојана закана. Непроспиени ноќи, пожари, оштетени или разурнати домови и постојана борба за преживување.
Луцк не беше во „црвената зона“ минатата ноќ. Колегата, д-р Волфганг Ресман, утрово само кратко искоментира:
„Ние сме во окото на ураганот“.
Изминува 1.608-от ден од почетокот на целосната руска инвазија. Сега е 21:30 по локално време. Нова ноќ на неизвесност се спушта над Украина. Агресорот ја користи ноќта како штит и како оеужје против цивилите. Секој ден и секоја ноќ – ново воено злосторство.
Џабир Дерала
Од Луцк, Украина
