Уште една жртва во затворот „Идризово“, односно 8 лица починаа во текот на годината, а до крајот на годината останаа уште неколку дена.
Од Управата за извршување на санкции не добивме одговор за смртта на битолчанецот Д.Б. (39) кој издржувал затворска казна во КПУ „Идризово“ кој што ноќеска починал во Клиничкиот центар „Мајка Тереза“ во Скопје, каде бил донесен откако му се слошило додека бил во неговата ќелија.
„Директорот не е тука да ви даде изјава, друг не може да ви даде изјава, јавете се во КПД Идризово“, за ЦИВИЛ Медиа кратко одговорија на телефон од Управата. На е-маил исто така не добивме одговор.
Безуспешни беа нашите јавувања во затворот „Идризово“, бидејќи никој не крева на телефонска слушалка.
„Македонија наследи ужасни затвори. Освен констатирање на морбидната реалност и броењето на жртвите на нечовечниот пенитенцијарен систем во земјата, мора да се поднесе и одговорност за овие трагични случаи. Не може директорите на Управата за извршување санкции и на затворите во кои умираат луѓе да останат недопрени. Не само што мораат да дадат одговори пред јавноста, тие мораат и да поднесат одговорност. Најмалку што можат да направат е да ги стават своите функции на располагање, односно да поднесат оставки.“ – изјави Џабир Дерала, претседател на ЦИВИЛ – Центар за слобода.
Дехран Муратов
