„Градоначалничката на Скопје, неспособна и агресивна, која ги надминува ингеренциите и не знае со која територија всушност владее“
„Градоначалникот на Општина Кисела Вода, пак, неписмен, лажго и без основни познавања за функционирањето на институциите“
Ова се двете главни поенти од препукувањето меѓу Град Скопје, односно градоначалничката Данела Арсовска, Општина Кисела Вода, односно градоначалникот Орце Ѓорѓиевски и ЈП Комунална хигиена.
Од прес-конференцијата на Ѓорѓиевски и реакциите од Град Скопје и ЈП Комунална хигиена, може да се заклучи дека Скопје и понатаму ќе се гуши во ѓубре. Вистинско или политичко, најмалку е битно и така цехот го плаќаат граѓаните.
Независно кој е во право, а кој не со отпуштањата на 11-те вработени од Комунална, „мафијашките“ игри на локалните шерифи е нивна заедничка одговорност.
Реакција има и од СДСМ од каде овој пат, ги подбраа сите градоначалници на ДПМНЕ во Скопје, а помеѓу нив и Орце Ѓорѓиевски како дел од проблемот во градот и дека „ниту еден од нив не може да побегне од одговорноста за хаосот што го направија“. А, како што велат, сметот не е единствениот проблем.
А за фрлањето отпад пред Дрисла, освен Ѓорѓиевски, казна ќе добие и градоначалникот на Сопиште, Стефче Трпковски. Казната за двајцата изнесува над 130 илјади евра за одложување на отпад на јавна површина.
За неспособноста, неписменоста и нефункционалноста допрва ќе се докажуваат и Арсовска и ВМРО-ДПМНЕ.
Денеска, градоначалничката не се појави на вонредната седница на Советот на Град Скопје иницирана од СДСМ, кои дадоа предлози за решавање на состојбата со собирањето на отпадот, но и побараа оставка од Арсовска. Советниците од ВМРО-ДПМНЕ, пак ја искористија приликата да ја нападнат Арсовска и побараа задолжително присуство на сите страни за да се одржи дебата која ги засега сите граѓани.
За граѓаните останува да се надеваат дека помалку ќе се дебатира, а повеќе ќе се работи на решавање на проблемот со отпадот во Скопје.
Б. Ј.
