Првиот вицепремиер и министер за политички систем и односи меѓу заедниците, Артан Груби денеска и утре ќе престојува во Тирана каде што ќе се сретне со државниот врв и лидерите на албанските политички парти. Тема на разговор на состаноците ќе биде билатералната соработка, европската интеграција, пандемијата и процесот на Попис во Република Северна Македонија.
Во 10:30 часот ќе се одржи прес-конференција на која ќе биде претставен Граѓанскиот инспекциски совет при Државниот инспекторат за животна средина (ДИЖС). Целта на советот е поефикасна соработка на Инспекторатот со граѓанскиот сектор.
Во 12:00 часот заедничка прес-конференција ќе одржат портпаролот на Владата на Република Северна Македонија, Душко Арсовски и Јасмина Ѓоргиева од Државниот завод за статистика. Темата на прес-конференцијата е претстојниот Попис на населението, домаќинствата и становите, активностите кои се во тек, како и осврт на пописот во дијаспората.
Во Собранието на Република Северна Македонија денеска ќе одржат четири седници:
–Седница на собраниската Комисија за економски прашања, каде единствена точка на дневниот ред на Комисијата за економски прашања ќе биде Предлог-законот за изменување и дополнување на Законот за градежните производи, во прво читање, со почеток во 11:00 часот.
-Седницата на собраниската Комисија за одбрана и безбедност ќе започне во 12:00 часот. На дневниот ред на Комисијата за одбрана и безбедност има осум точки, меѓу кои и Предлог-одлуката за изменување на Одлуката за одобрување на продолжување на рокот за постоење кризна состојба на дел од територијата на Република Северна Македонија, заради заштита од илегална миграција и заштита на јавното здравје во услови на постоење на пандемија прогласена од Светската здравствена организација за КОВИД-19 и спречување од негово ширење и поради висок ризик и зголемен обем на влез и транзитирање на мигранти низ територијата на државава.
На дневниот ред се и предлог-законите за изменување и дополнување на Законот за служба во Армијата, во прво читање, за изменување на Законот за заштита од експлозивни материи и за изменување и дополнување на Законот за странци, двата во второ читање.
– Седница на собраниската Комисија за финансирање и буџет ќе започне во 12:30 часот каде ќе се разгледуваат Предлог-законот за буџети, Предлог-законот за изменување и дополнување на Законот за финансиска полиција, како и Предлог-законот за продажба на станови кои потекнуваат од станбениот фонд на поранешна ЈНА или се добиени по пат на замена на недвижен имот кој потекнува од поранешната ЈНА и се доделени на користење на лица вработени во Министерството за одбрана и Армијата, трите во прво читање.
-Седници на Законодавно-правна комисија со почеток во 13:30 и 13:45 часот. Законодавно-правната комисија ќе одржи две последователни седници со вкупно 26 точки на дневен ред, од кои на првата се предлог-законите за изменување на Законот за спречување на насилството и недостојното однесување на спортските натпревари и за дополнување на Закон за научно-истражувачката дејност, поднесен од пратеници од власта, двата во прво читање. На втората седница на оваа собраниска комисија има 24 законски решенија, меѓу кои и Предлог-законот за образование на возрасните, во прво читање, предлог-законите за изменување на Законот за меница, на Законот за фондот за осигурување на депозити, на Законот за лизинг и на Законот за финансиските друштва, сите во второ читање.
Најавите се од сервисот на МИА.
Редакцијата ги повикува граѓанските организации и други заинтересирани субјекти да ги испраќаат своите соопштенија, најави за настани и активности, секој ден, најдоцна во 8 часот наутро, за да се најдат во утринскиот преглед на најави на нашата медиумска платформа. Се разбира, прилозите пристигнати по тој термин, исто така, ќе бидат земени предвид за објавување.
