ВЕСТ НА ДЕНОТ
Американското знаме за прв пат предадено на наш министер
Американската амбасадорка Кејт Мери Брнз денеска и предаде американско знаме на министерката за одбрана Радмила Шекеринска, како знак на заслуги за одбранбената соработка меѓу Северна Македонија и САД, на церемонија во Скопје што започна со интонирање на химните на двете земји.
Шекеринска е првиот наш министер на кој му е врачено американско знаме како симбол и признание за одличната соработка и зајакнато партнерство и сојузништво со САД.
– Благодарение на вашата визија и влијание, Армијата на Северна Македонија брзо се модернизираше и се движеше напред во целосна НАТО интеграција. Како најнов член на Алијансата, Северна Македонија веќе е значителен придонесувач кон стабилноста и безбедноста. Под вашето лидерство, САД и Северна Македонија дополнително ја продлабочија меѓусебната соработка како никогаш досега во 28-годишната соработка во одбраната на двете земји, што најдобро ја потврдува развојот на „Криволак“ во најдобра тренинг зона во Европа. Прифатете го ова знаме, што се вееше над Амбасадата на САД во Скопје, како симбол на наша благодарност и пријателство, рече амбасадорката Брнз.
ИЗЈАВА НА ДЕНОТ
-Сакам да демантирам дека самиот сум се повлекол. Тоа не е точно. Јас не сум човек што се повлекува од битки. Не се повлеков затоа што чувствувам одговорност и сметам дека позициите што ги застапувам во процесот на преговори со Бугарија се исправни и важно е да се одржат. Имав сериозна битка внатре особено во последната година во однос и на дефинирањето на националните позиции, значи за самата суштина на маката, ама и на стратегијата, односно на текот на самите преговори. Таа битка не беше тајна. Разликите беа евидентни и во јавните пораки и во јавните настапи, изјави Вицепремиерот задолжен за европски прашања Никола Димитров на денешната прес-конференција, во врска со информацијата дека нема да биде дел од новата влада.
ФЛЕШ ВЕСТИ
РЕАКЦИЈА Од кабинетот на премиерот Заев стигна реакција по повод изнесените ставови од Вицепремиерот задолжен за европски прашања Никола Димитров на денешната прес конференција.
Од кабинетот на Заев истакнуваат дека Северна Македонија има јасни позиции во разговорите со Бугарија, изградени со целосно владино единство и испратени како одговор од нашето МНР до бугарското МНР. Македонскиот идентитет и македонскиот јазик воопшто не се тема на разговор помеѓу нас и Бугарија.
Македонските позиции дадени како наш одговор по однос на темите кои се предмет на разговори со Бугарија, за кои јавноста е добро запознаена, се изградени низ сеопфатен консултативен процес и работни состаноци во кои Никола Димитров имаше активна и суштинска улога и за кои придонесе со своите ставови, а пак таквите наши позиции се целосно на линија на португалскиот предлог кој беше предлог и на словенечкото претседателство, но и целосно во согласност со Резолуцијата усвоена во Собранието на Северна Македонија, се вели во реакцијата.
АНКЕТА БНТ Расте процентот на граѓани во Бугарија кои сметаат дека треба да се каже „да“ за почеток на преговорите меѓу Северна Македонија и ЕУ и без претходен договор за отворените прашања. Ова е мислењето на 29,6 отсто од испитаниците, што е зголемување за околу 13 отсто во однос на ноември 2020 година, покажува истражувањето на јавното мислење спроведено од Алфа Рисрч презентирано за време на познатата неделна коментаторска емисија „Референдум“ на Бугарската национална телевизија посветена на бугарско-македонските односи.
БЛОКАДАТА на Бугарија кон Северна Македонија во однос на интеграцијата на земјата во Европската Унија, претседателот на Албанија Илир Мета ја смета за неправедна. Во изјава за Порталб.мк тој рече дека сепак е оптимист дека овој спор наскоро ќе биде затворен.
ЛАЖНИ ВЕСТИ Повеќе од 80 организации за проверка на факти ја повикаа онлајн видео платформата Јутјуб подобро да се бори против дезинформациите, нудејќи помош за разоткривање на лажни тврдења.
– Секој ден гледаме дека YouTube е еден од главните канали на онлајн дезинформации ширум светот, истакнаа групи од целиот свет – од Политифакт и Вашингтон пост во САД до Африка чек (Africa Check) со седиште во Кенија.
– Видеата што содржат лажни информации останаа „под радарот на политиките на Јутјуб, особено во земјите од неанглиско говорно подрачје, велат тие во отворено писмо до шефицата на платформата Сузан Војчицки.
СОСТАНОК Во Брисел денеска се одржува состанок на Советот НАТО-Русија. Русија на првиот состанок на Советот во последните две години ја претставуваат заменик министерот за надворешни работи Александар Грушко и заменик министерот за одбрана Александар Фомин.
МОНИТОРИНГ
Еден угледен портал на македонски јазик деновиве објави содржина поврзана со Шарената револуција. Прилогот, кој содржеше ставови на учесничка во овие протести во 2016 година, беше објавен а потоа и спонзориран на Фејсбук страницата на медиумот, и предизвика повеќе коментари, дел од кои содржеше и стравотен говор на омраза и навреди кон активистката.
„Сите од шарените треба Жена парк голи и да се полијат со боја да бидат вистински шарени за злото што и го донесоа на Македонија“…„Кривец е Груевски што сите не ве поапси за уништување на државен имот ненормални едни“…„Мрш северџанко“…„Смрдушкава глупава уште се гребе“, е дел од коментарите што користат навреди, говор на омраза и повикуваат на насилство кон активистката и учесниците во Шарената револуција.“, пишува меѓу другото во анализата Петрит Сарачини.
ИНТЕРВЈУ
Бабановски: Никој не знае каде заврши оружјето што му гo донесе Аркан на Мијалков
Експертот за безбедност и универзитетски професор во пензија, Проф. д-р Иван Бабановски зборува за тоа која е врската меѓу нелегалната трговија со оружје со организираниот криминал во земјата и регионот. Разговорот со Проф. Бабановски е дел од активностите на проектот на ЦИВИЛ „Минатото, сегашноста и иднината на контролата на оружјето во Република Северна Македонија“ со поддршка од Глобалната иницијатива против транснационалниот организиран криминал и Резилиенс фонд.
БРЗА ПОШТА
СвеЦки заговор против Димитров
„Понесен од суетата дека ете, него, токму него, најпаметниот, најубавиот, најзгодниот од сите министри, нема да го има во новата влада, а тој самиот не се откажал, туку, ете, замислете, они се дрзнале веќе да не го играат, вицепремиерот задолжен за европски прашања, Никола Димитров одржа прес конференција за да ја соопшти таа жална вест за македонската , а богами и за бугарската и свеЦката јавност, јер освен тукашните, не го сакале (веќе) ни надворешните фактори, па сковале свеЦки заговор за да му напакостат.“, пишува Драган Мишев во БРЗА ПОШТА.
СЛОБОДНА ЗОНА
„Едноставно е, ако политичарите сакаат решенија на овие експертски проблеми, треба да повикаат експерти – и меѓународни и домашни, кои ќе работат на решавањето на проблемите со говорот на омразата и непочитувањето на човековите права во Бугарија и Македонија. Меѓутоа, не гледам дека има искрена политичка волја во Бугарија и Македонија за решавање на споменативе проблеми, туку поскоро гледам обид за политизирање и на говорот на омраза и човековите права, исто како што бевме сведоци на политизирање на историјата кое доведе до тотална блокада на работата на комисијата за историски и образовни проблеми.“, пишува Жарко Трајановски во колумната „Ако се сака, има решенија и за говорот на омраза и непочитувањето на човековите права во Бугарија и Македонија. Ама, дали се сака?“
„Постојано слушавме само што не отпочнала борбата против корупцијата, борба за санирање на последиците од истата. За таа цел се изнагледавме едно чудо реформи во законодавството, судството, образованието здравството и каде уште не. Видовме безброј планови и програми, а ефектот е рамен на нула. И затоа искрено се плашам дека новата вицепемиерка задолжена за борба со корупцијата може успешно да се вклопи во досегашната воспоставена матрица на однесување и дејствување на овој план.“, прочитајте во колумната на Јове Кекеновски, Порака до идната вицепремиерка за борба против корупцијата“.
Д. Тахири
