Денеска во Џеда, Саудиска Арабија – под милосрдното гостопримство на престолонаследникот Мохамед бин Салман – Соединетите Држави и Украина презедоа важни чекори кон враќање на трајниот мир за Украина, се вели во заедничката изјава за резултатите од средбата на делегациите на Украина и САД што ја објави Украинската амбасада во Северна Македонија.
Претставниците на двете нации ја пофалија храброста на украинскиот народ во одбрана на својата нација и се согласија дека сега е време да се започне процес кон траен мир.
Украинската делегација ја повтори силната благодарност на украинскиот народ до претседателот Трамп, Конгресот на САД и народот на Соединетите Држави за можниот значаен напредок кон мирот.
Украина изрази подготвеност да го прифати предлогот на САД за донесување итен, привремен 30-дневен прекин на огнот, кој може да се продолжи со заеднички договор на страните, а кој е предмет на прифаќање и истовремено спроведување од страна на Руската Федерација. Соединетите Држави ќе и соопштат на Русија дека рускиот реципроцитет е клучот за постигнување мир.
Соединетите Држави веднаш ќе ја укинат паузата за споделување разузнавачки информации и ќе продолжат со безбедносната помош за Украина.
Делегациите разговараа и за важноста на напорите за хуманитарна помош како дел од мировниот процес, особено за време на гореспоменатиот прекин на огнот, вклучително и размена на воени заробеници, ослободување на цивилни затвореници и враќање на насилно префрлените украински деца.
Двете делегации се согласија да ги именуваат своите преговарачки тимови и веднаш да започнат преговори за траен мир кој обезбедува долгорочна безбедност на Украина. Соединетите Држави се обврзаа да разговараат за овие конкретни предлози со претставници од Русија. Украинската делегација повтори дека европските партнери ќе бидат вклучени во мировниот процес.
Конечно, претседателите на двете земји се согласија да склучат што е можно поскоро сеопфатен договор за развој на критичните минерални ресурси на Украина за да се прошири украинската економија, да се надоместат трошоците за американската помош и да се гарантира долгорочниот просперитет и безбедност на Украина.
По повод заедничката изјава на делегациите на САД и Украина, на социјалната мрежа Х се огласи украинската амбасадорка во земјава, Лариса Дир, која води своевиден дневник на социјалните мрежи од пошетокот на руската воена агресија врз Украина.
11.03.2025. Заедничка Украинско – американска изјава по резултатите од средбата на делегациите на Украина и Соединетите Американски Држави во Џеда, напиша амбасадорката Дир.
Таа во твитот ги објави и заклучоците од средбата.
Драган Мишев
