И додека се чека на на потпис од претседателот Стево Пендаровски за Законот за попис, кој претходно најави дека пред да го потпише ќе се консултира со правни експерти за да не биде попречен од одредени политички влијанија, односно „ни требаат конкретни изјави дека и по смена на власта никој нема намера да го менува Уставот и да ги одзема правата“, опозицијата не отстапува од таканаречениот „бојкот на пописот“.
Пратеникот и портпаролот од СДСМ Костадин Костадинов, на Твитер го постави прашањето за релевантоноста на 10.000 потписи што ВМРО-ДПМНЕ планира да ги собере за спречување на пописот.
„ДПМНЕ ќе собирало 10.000 потписи за поништување на законот за попис. Зошто кога тоа може да го направи со само еден пратеник? Не сакам да верувам дека е непознавање, но отвора дилеми за стабилноста во пратеничката група со сигурност.“, напиша Костадинов на Твитер.
Сепак, од ВМРО-ДПМНЕ повикуваат Пендаровски да не го потпишува Законот и „ да го спречи овој фалсификат во обид“.
„Со пописот што ќе се одржи на пролет, со оваа најобемна статистичка операција ќе се соберат релевантни, точни податоци за географски, демографски, економски, образовни, миграциски, културолошки карактеристики како и информации за инвалидитет, односно функционална попреченост на населението. Овие податоци се од непроценливо значење за креирање на многу економски политики, рамномерен регионален развој, соодветни политики во образованието, здравствената заштита, културата, односно за креирање на издржани политики и стратегии за сестран развој на државата. Опструкција на пописот од страна на ВМРО-ДПМНЕ не е начин да се помогне на државата, туку се одмага, како што е случај за многу работи во последните години“, се вели и во денешното соопштение на СДСМ, со цел објаснување за легитимноста и статистичката функција на пописот, а не како што се изрази во денешното соопштение ВМРО-ДПМНЕ дека „ Заев сака попис кој е однапред договорен, со испазарени бројки“.
*
„Јавноста треба да ги знае сите детали за пописот, треба да се подготвиме сите, бидејќи иако е статистичка, оваа активност не е само статистичка, туку е активност што треба да обезбеди податоци за општо добро. Податоци со коишто ќе се креираат развојни политики во државата наредните десет години, и врз основа на тоа, секој граѓанин во нашата држава да има бенефит од оваа работа“, вели Симовски, надополнувјќи дека политизацијата на самиот попис не е резултат само во случајот со неуспешниот во 2011, туку тоа е практикувано и во претходниот систем.
Иако ВМРО-ДПМНЕ спори околу користењето на фингерпринт терминали при попишување, со повторното актуелизирање на пописот минатата година, се отвори прашањето и за вклученот или исклученост на етничката припадност во пописот.
„Јас бев промоторот на идејата во овој попис да се исклучи белегот на етничка припадност, не поради тоа што тој белег не дава убави, интересни и корисни информации, туку заради тоа што тој белег е главниот момент каде што политиката се фаќа за пописот и сака да го злоупотреби до максимум… Но јавноста реагираше како што реагираше, и прифативме тој белег да биде вклучен бидејќи јавноста има интерес. Ќе биде вклучен во пописот и секој слободно ќе може да се изјасни како што сака“, изјави Симовски.
Во
анкетата на ЦИВИЛ Медиа, на прашањето зошто е важно да се одржи попис, граѓаните во поголем број ја истакнаа потребата за попис и придобивките од оваа статистичка операција. Само мал дел изразија недовеба во институциите, смметајќи дека ќе се злоупотреби за политички цели.
Законот за попис кој се
изгласа во Собранието со 62 гласа „за“, без „против“ и „воздржани“, и кој се планира да се спроведе од 1 до 21 април, ќе се врши на јазикот што ќе го избере лицето кое се попишува или лицето кое ги дава податоците. Исто така, законот предвидува и глоба во износ од 200 до 300 евра во денарска противвредност за прекршок на физичко лице ако одбие да ги даде податоците што се бараат од него за Пописот или ако даде неточни податоци.
Б. Ј.
