Владејачките партии, вонпарламентарни партии и невладини организации се обединија под слоганот „Заедно ЗА европска Македонија“ во повикот до граѓаните за позитивен исход на референдумот и за евро-атлантска иднина на Македонија. Премиерот Зоран Заев кој ја промовираше кампањата најави дека во коалицијата што ќе води кампањата „Излези ЗА европска Македонија“ заедно се здружени околу стотина субјекти и се очекува таа бројка да расте.
Македонскиот премиер Зоран Заев и денеска ја повика опозициската ВМРО-ДПМНЕ да се приклучи и да овозможи успешен референдум за, како што рече, успешна иднина на заедничката држава. Потребно е единство, потенцира Заев, додавајќи дека може опозицијата и власта да се различни и да не се согласуваат по многу прашања, но оти во историски моменти сите треба да застанат заедно бидејќи државата нема друг алтернативен пат.
Владиниот портпарол Миле Бошњаковски денеска изјави дека целосно се почитуваат препораките на Венецијанската комисија во однос на вклучувањето на владините претставници во кампањата за претстојниот референдум.
Тој изјави дека секојдневните активности се поврзани со нивниот државен стратегиски интерес и така е во изминатите 27 години од независноста на Македонија.
Доцна синоќа на Порта Македонија во центарот на Скопје почна поставувањето на бројчаникот на кој, според најавите, ќе се покажува колку од украдените пари од претходната власт се враќаат во Буџетот.
Судечкиот совет во Апелацискиот суд не го прифати барањето на адвокатите на обвинетите за одложување на седницата на која се одлучува по жалбата на поранешниот премиер Никола Груевски за пресудата во случајот „Тенк“ за набавката на луксузниот „мерцедес“ вреден 600 илјади евра.
Дваесет и два коригирани учебника за учебната 2018/2019 ќе достави Министерството за образование и наука низ училиштата. По првпат од оваа учебна година сите учебници што МОН ги обезбедува бесплатно за учениците истовремено ќе бидат во слободна продажба и тоа со истата цена по која Министерството ги откупува.
А. Петровска
