Кандидатите за шеф на државата стартуваат со изборните каравани. Секој со своја програмa и со ветувања дека ќе обединуваат, влегуваат во трка за прибирање што повеќе гласови. Копја на терен, ќе кршат седум кандидати за фотељата во вила Водно.
На овие избори ќе учествуват актуелниот претседател Стево Пендаровски поддржан од СДСМ, а потоа Гордана Силјановска Давкова од ВМРО-ДПМНЕ, Билјана Ванковска од „Левица“, Арбен Таравари од коалицијата „ВЛЕН“, Бујар Османи од коалицијата „Европски фронт“, Стевчо Јакимовски од ГРОМ, и Максим Димитриевски од „Движењето ЗНАМ – За наша Македонија“.
Претседателот на државата Стево Пендаровски ја почнува кампањата за втор мандат со вечерен митинг во Прилеп во 20 часот. Претходно, Пендаровски ќе ги посети Кривогаштани и Крушево.
Со слоганот „Македонија повторно твоја“ кандидатката на ВМРО-ДПМНЕ Сиљановска-Давкова ја почнува кампањата со митинг пред зградата на Владата.
Претседателскиот кандидат на Движењето ЗНАМ, Максим Димитриевски од Крушево ќе ја почне кампањата за претседателските избори. Караванот ќе заврши во Струмица на 22 април. Слоганот на кампањата е „Максимум за Македонија“, а програмата ќе биде именувана како „Манифест за Македонија“.
А кандидатот за претседател на коалицијата Европски фронт, Бујар Османи најави дека на пладне ќе одржи прес-конференција пред претседателската вила кадешто се очекува да даде пораки. Ова коалиција на овие избори ќе трча со слоганот „Не на Русија, Да за Европа“. Од друга страна кандидатот за претседател од коалицијата „ВЛЕН“ Арбен Таравари најави засилена кампања по рамазанските пости.
Во Струмица вечерва, Ванковска, заедно со лидерот на Левица и носител на ИЕ 1, Димитар Апасиев, и носителот на ИЕ 4, Сашко Јанчев ќе се обратат во Домот на културата „Антон Панов“.
Коалицијата „Храбро за Македонија“, предводена од ГРОМ, ПЦЕР и ИНТЕГРА го промовираше Стевчо Јакимовски, лидер на ГРОМ, за кандидат за претседател на Северна Македонија на претседателските избори. Јакимовски најави дека неговата кампања ќе оди во две насоки – реформа на Судскиот совет и Уставниот суд, како и развој на наменското производство.
Претходно шест од вкупно седум кандидати за претседател на државата на 2 април потпишаа Кодекс за фер и демократски избори во Државната изборна комисија. Кодексот не го потпиша само кандидатот Стевчо Јакимовски од партијата ГРОМ. Содржината на Кодексот е кандидатите да ги почитуваат сите закони, да не користат говор на омраза со цел избоите да бидат спроведени успешно и фер, за што ќе се залага и Државната изборна комисија.
Согласно редоследот на претседателските кандидати на гласачкото ливче за претседателски избори, под број еден е кандидатот на СДСМ – Стево Пендаровски. Број два е кандидатот за претседател на ВМРО-ДПМНЕ, Гордана Силјановска-Давкова, број три е кандидатот на ГРОМ, Стевчо Јакимовски. Под број четири е кандидатот на ДУИ, Бујар Османи, под број пет е Билјана Ванковска-Цветковска, кандидат на Левица. Под број шест е Арбен Таравари од Алијанса за Албанците и под број седум е кандидатот на ЗНАМ – Максим Димитриевски.
На 24 април ќе се одржи првиот, а на 8 мај вториот круг претседателски избори заедно со парламентарните избори, први што ќе се одржат во редовен термин од 2006 година.
На 22 април завршува изборната кампања за претседателските избори
Изборната кампања за претседателските избори закажани за 24 април годинава официјално започнува денеска а ќе трае до 24 часот на 22 април.
Според роковникот што го усвои ДИК, изборната кампања започнува 20 дена пред денот на изборите и во првиот и вториот круг на гласање не смее да трае 24 часа пред денот на изборите и на денот на изборите.
Резултати од испитувањата на јавното мислење поврзани со учесниците во изборниот процес се објавуваат најдоцна пет дена пред денот определен за одржување на изборите, најдоцна на 18 април до 24 часот.
Од Државната изборна комисија информираа дека за изборите за претседател на државата што ќе се одржат на 24 април запишани се 1.814.317 избирачи, додека за парламентарните избори закажани за 8 мај запишани се вкупно 1.815.350 избирачи во Избирачкиот список.
Што е изборна кампања?
„Изборна кампања е јавно претставување на потврдените кандидати од надлежните изборни органи и нивните програми во предизборниот период за одреден вид на избори“, стои во појмовникот во член 2 на Изборниот законик.
Понатаму, во член 69-а, Законикот подетално ја дефинира кампањата како: „Јавно собирање и други јавни настани организирани од страна на учесникот во изборната кампања, јавно истакнување на плакати, видео презентации на јавни места, изборно медиумско и интернет претставување, дистрибуирање на печатени материјали и јавно претставување на потврдените кандидати од надлежните изборни органи и нивните програми“.
Назми Абдурахмани
