ВЕСТ НА ДЕНОТ
Кривичниот суд Скопје, првообвинетиот во случајот „ТНТ“ Никола Груевски (во бегство), го прогласи за виновен и го осуди на девет години затвор, додека обвинетиот поранешниот министер за транспорт и врски Миле Јанакиески, е осуден на три години затвор. Екс-градоначалникот на општина Гази Баба, Тони Трајковски, исто така прогласен за виновен и осуден на четири години. Иста казна затвор од четири години и беше изречена и на обвинетата Елизабета Најдовска.
Според обвинителниот акт поднесен од поранешното СЈО, во временскиот период од 01.04.2011 година до крајот на 2012 година во Скопје, обвинетиот Никола Груевски, во својство на премиер на Владата и обвинетиот Миле Јанакиевски – министер за транспорт и врски, заеднички со цел да му се одмаздат на оштетениот Фиат Цаноски за неговата политичка одлука кој како претседател на политичката партија ПЕИ, ја напуштил коалицијата со политичката партијата ВМРО-ДПМНЕ и склучил коалиција со опозициската политичката партија СДСМ, искористувајќи ја нивната реална моќ со умисла го поттикнале обвинетиот Тони Трајковски, тогашен градоначалник на општина Гази Баба, да стори кривично дело „Злоупотреба на службената положба и овластување” и да тој ја искористи својата службена положба и незаконски да го сруши станбено-деловниот објект Космос што бил граден од оштетениот-инвеститорот оштетениот Фиат Цаноски.
ВОЈНА ВО УКРАИНА
Русија го искористи масовното предавање на украинските војници во фабриката за челик Азовстал во Мариупол како пропаганден подарок во средата, користејќи го за лажно да ги означи како терористи и да создаде паралелен наратив на украинскиот приказ на руските војници како грозоморни воени злосторници, пишува Њу Јорк Тајмс.
*
Заедно мораме да се погрижиме Русија да нема успех во нејзината агресија против Украина, ниту воена, ниту економска или која било друга, кажа украинскиот претседател Володимир Зеленски во своето видео обраќање.
*
Заменик-командантот на Азовскиот полк, капетанот Паламар (Калина) снимил видео во кое ги негира информациите дека ја напуштил територијата на челичарницата Азовстал во Мариупол и им се предал на руските освојувачи, објави на Телеграм украинскиот воен дописник Андриј Цаплиенко, пренесува Укринформ.
*
Украина денеска ќе ја добие втората транша макрофинансиска асистенција од ЕУ, во износ од 600 милиони евра. Ова го соопшти утрово на Твитер претседателката на Европската Комисија, Урсула фон дер Лајен и најави дека “пристигнуваат и повеќе“ пари.
ИЗЈАВИ
Кулеба: НАТО ништо не направи за Украина
„Е.У. се покажа како организација способна да дејствува како обединет фронт и да носи моќни, важни, тешки одлуки за разлика од НАТО… Да, точно е дека членовите на алијансата, поединечно или во мали групи, навистина прават одлична и важна работа, обезбедувајќи витална помош… Но, НАТО како институција не направи ништо за ова време“, изјави министерот за надворешни работи на Украина, Дмитро Кулеба.
ДИСТРИКТ
Во Дистрикт на Цивил Прес Студио, интервју на Зоран Иванов со Викторија Кафеџиска – комуниколог, доктор на науки, професорка на Меѓународниот балкански универзитет, зборува за новинарите и медиумите, медиумската писменост и злоупотребата на јавниот простор, интернетот, лажните вести и говорот на омраза и за уште по нешто.
МУЛТИКУЛТУРАЛИЗАМ
Мулти култи бриф, десетто издание
ФЛЕШ ВЕСТИ
ОПАСНОСТ Нови дојави за бомби во повеќе од 100 училишта низ Србија. Како што соопшти министерството за образование на Србија, пријавите за поставени бомби биле испратени на на и-маил адресите на 134 основни училишта на територијата на Нови Сад, како и во некои училишта во Пирот, Ниш, Бабушница, Власотинце, Лебане и Куршумлија. На учениците им е соопштено дека наставата ќе се одвива онлајн.
ПРАВДА Во Штип одредни родители почнале и со промена на адресите за живеење, со цел нивните деца да не се запишат во училиштето „Гоце Делчев“, туку од 1 септември да седнат во училишните клупи на друго училиште. Токму непочитувањето на реонизацијата при упис на првачињата донесе и неколку тужби за сегрегација пред македонските судови и во Стразбур. Едно од тужените училишта е штипското „Гоце Делчев“, во кое има најмногу барања за трансфер на првачињата во други училишта. Во оваа училиште има чисти ромски паралелки, и по ова постапува и Хелсиншкиот комитет за човекови права.
АНТИКОРУПЦИЈА Државната комисија за спречување на корупцијата утврдила слабост во употребата на балансерот при вработување на административни службеници – нема утврдена постапка за проверка на веродостојноста на податоците, ниту е направена единствена база од која ќе се добиваат податоци за етничката припадност на кандидатите, и предлага во новиот Закон за вработени во јавниот сектор и Законот за административни службеници или да се предвидува ефикасна алатка за спречување на злоупотреба на балансерот при вработување во јавниот сектор или балансерот да се укине бидејќи е претворен во алатка за злоупотреба и понижување.
ОБРАЗОВАНИЕ Министерството за труд и социјална политика и СОНК ги потпишаа измените и дополнувањата на колективниот договор со кој се регулира исплатата на плати и придонеси на плати за време на штрајк, по што тие ќе бидат испратени во Службен весник. Покрај потпишувањето на измените и дополнувањата, МТСП и СОНК договориле до крајот на мај да биде донесен и новиот колективен договор
Б. Јордановска