„Сите сили ќе ги насочиме да изградиме правда и правна држава, да обезбедиме услови за квалитетен живот на сите граѓани во Македонија со меѓусебно разбирање, кон почитување на мултиетничноста во државата и Рамковниот договор. На овој начин само ќе ги отвориме вистинските перспективи на граѓаните и на современа, модерна и евроатлантска Македонија“, ијзави мандатарот, лидерот на СДСМ, Зоран Заев, откако денеска претседателот Ѓорге Иванов, на два дена пред истекот на рокот, му го додели мандатот.
Во кратката изјава за медиумите по доделувањето на мандатот, Иванов изјави дека пречките за формирање на нова влада се отстранети и затоа му го доделува мандатот на Заев, кој го обезбеди потребното собраниско мнозинство, според кое, е определен за мандатар за состав на нова влада.
„Денеска пристапуваме кон исполнување на член 84, алинеја 1 од Уставот на Република Македонија за определување мандатар за состав на Владата на Република Македонија“, истакна Иванов.
https://www.facebook.com/civil.mk/videos/1301844999933966/
По добивање на мандатот, Заев изјави дека заедно со партиите што ги дадоа своите потписи за формирање на мнозинството, ќе се организираат да го скратат рокот од 20 дена што е предвиден за формирање влада и дека ќе се потрудат тоа да го сторат за најмногу 10 дена.
„Се обврзувам дека ќе работам со сите вас, и новата влада ќе биде влада на сите граѓани. Овој ден е нов почеток за Македонија. Сите сили ќе ги насочиме да изградиме правда и правна држава, да обезбедиме услови за квалитетен живот на сите граѓани во Македонија со меѓусебно разбирање, кон почитување на мултиетничноста во државата и Рамковниот договор. На овој начин само ќе ги отвориме вистинските перспективи на граѓаните и на современа, модерна и евроатлантска Македонија“, изјави Заев.
„Ниеден документ, платформа, декларација, акт или дејство, спротивни на погоре наведените ставови не можат да бидат услов, ниту основа за формирање и дејствување на влада на Република Македонија“, стои во писмената изјава, потпишана од Заев, која денеска му беше предадена на претседателот Иванов.
Заев потсети дека точно пред две години на денешен ден, беше испратена порака од граѓанска Македонија, дека граѓаните се подготвени да работат заедно на демократски вредности, и на решенија кои ги спојуваат, а не кои ги делат.
„Гласот на обединета, шарена Македонија е гласот на единствена Македонија!“, заклучи Заев.
Високата претставничка за надворешни работи и безбедносна политика на Европската унија, Федерика Могерини и еврокомесарот Јоханес Хан ја поздравија одлуката на Иванов за доделувањето на мандатот на Зоран Заев за формирање на влада.
„Ова е тоа што народот го сака и го заслужува. Ние сме подготвени да ја поддржиме новата влада во своите реформски напори“, се вели во изјавата на Хан и Могерини.
М. Теговска
