Заврши едногодишното претседавање на Република Северна Македонија со Процесот за соработка во Југоисточна Европа (ПСЈИЕ) под мотото „Премостувајќи Поделби, Градејќи Доверба”. Претседавачот на ПСЈИЕ и технички министер за надворешни работи, Бујар Османи, на денешната прес-конференција, оцени дека земјава успешно го заврши своето претседавање со Процесот, постигнувајќи консензус за две важни прашања.
Османи информираше дека на денешниот Самит за позицијата на генерален секретар на Советот за регионална соработка е номиниран кандидатот на Сараево, Амир Капетановиќ.
– Успехот којшто го постигнавме со двете најбитни прашања ги надминаа дури и нашите очекувања. Постигнавме консензус и го номиниравме кандидатот на Сараево, Амир Капетановиќ, за позицијата на генерален секретар на Советот за регионална соработка и Комитетот на политички директори постигна консензус за декларацијата од скопскиот Самит, која што беше поддржана од министрите и понатаму ќе оди на усвојување од страна претставниците присутни на денешниот Самит. Би сакал да ве уверувам дека скопското претседаваштво остана целосно посветено на она што се чинеше како сизифовска задача, назначување на генерален секретар до крајот на нашето претседателство. Кандидатурите кои што беа претставени на отворениот повик беа извонредни, сите се покажаа достојни на задачата и имаа неверојатни квалификации, тоа ја направи нашата задача уште потешка, рече Османи.
Имајќи ги во предвид последните циклуси на проширување на ЕУ, Османи вели не постои алтернатива за пристапување кон Унијата. Додаде дека регионот треба да избере дипломатија наспроти насилство, како и да работи на градење на одржлив процес којшто ќе ја направи посилна европската архитектура.
– Не постои алтернатива за пристапување кон ЕУ, имајќи ги во предвид последните циклуси на проширување на Унијата, кои потврдуваат дека се подобрува стабилноста на земјите кои што пристапуваат. Од клучно значење е да ги удвоиме напорите и да ги комуницираме позитивните влијанија од проширувањето, како и спроведувањето на кредибилни реформи и добрососедството. Регионот треба да избере дипломатија наспроти насилство и да работи на градењето на одржлив процес којшто ќе ја направи посилна европската архитектура, рече Османи.
Заменик-министерката за надворешни работи на Република Албанија, Артемис Мало, денеска во име на албанската влада изрази уверување дека Тирана како иден претседавач со ПСЈИЕ, го препознава значењето на Процесот и ќе продолжи да ја споделува колективната визија за европска иднина на регионот.
– Во овој многу важен момент би сакала да ја реафирмирам политичката посветеност на Албанија кон преземањето на четвртото претседателство на Тирана на ПСИЈЕ, под мотото „Обликување на европската иднина“. Ќе останеме целосно посветени кон придонесот за зајакнување на регионалната соработка, зголемувањето на соработката и имплементацијата на заедничкиот регионален пазар. Препознавајќи го значењето на ПСЈИЕ во унапредувањето на регионалната соработка, промовирањето на економскиот раст и безбедносната инфраструктура и помагањето на процесот на европска интеграција, ние признаваме дека ПСЈИЕ го води патот кон помирување, доверба, градење безбедност и просперитет во регионот. Во име на Министерството за надворешни работи на Албанија и на албанската влада, дозволете ми да истакнам дека со споделување на нашата колективна визија за европската иднина на регионот и почитување на различноста и заедничките вредности на секој учесник во Процесот, уверени сме дека учесниците на ПСЈИЕ ќе продолжат да се стремат кон европските аспирации на ЕУ, рече Мало.
