Се ситни втората недела од изборната кампања за Локалните избори. Проекти, ветувања, прес конференции, обвинувања, деманти, контраобвинувања, тоа е секојдневието и неизбежниот декор на кандидатите за градоначалници и за советнички листи, предводени од нивните лидери во освојувањето на гласовите на граѓаните. Трагедијата во тетово повторно искористена во предизборни цели, овој пат поради неприфаќањето на оставките, жалби и поплаки поради неостварени предизборни желби на кандидатите.
ОСТАВКИТЕ И ИЗБОРИТЕ
И неприфаќањето на оставките понудени од министерот за здравство, Филипче и заменик министерот Хасани, од страна на премиерот Заев, беше искористено како тема во најновите обвинувања и препукувања на релација опозиција/ позиција, со цел собирање политички поени и некој глас повеќе на локалните избори.
ЖАЛБИ И ПОПЛАКИ
Кандидатката за градоначалник на град Скопје, поддржана од ВМРО ДПМНЕ, Данела Арсовска се пожали дека денеска и беше забрането да влезе во просториите на Територијалната противпожарна единица – Автокоманда каде требаше да имам средба со Синдикатот на пожарникарите на Скопје, на што од Град Скопје реагираа на намерата одредени кандидати да ја злоупотребуваат противпожарната бригада за изборни цели.
АЛИЈАНСА ЗА АЛБАНЦИТЕ/ АЛТЕРНАТИВА
Кандидатот за градоначалник на Алијанса за Албанците/ Алтернатива за општина Тетово, Вулнет Мурсели денеска се сретна со членовите на Здружението на пензионери на Тетово. Тој рече дека тие целиот свој живот и го посветиле на Тетово и колку и да се трудиме за нив, тоа никогаш не може да се поистовети со нивниот придонес.
Лидерот на Алијанса, Зијадин Села, на централната прослава во Арачиново, ги претстави кандидатите на партијата за оваа општина и програмата за локалните избори.
ДОМ и ЛДП
Движењето „Одлучно за промени“, организираше онлајн трибина на тема „ Во какво Скопје сакаш да живееш“ на која учествуваа нивниот кандидат за градоначалник на Град Скопје Бени Шаќири, Никола Пановски, носителот за советничката листа за Скопје, Теодора Крстева, кандидатка за советничка од та листа, кандидатот за градоначалник на Центар, Антони Новотни, додека модератор на трибината беше претседателката на ДОМ, Маја Морачанин.
СДСМ
Претседателот Зоран Заев беше меѓу граѓаните на Општините Петровец и Илинден, каде што ги претстави кандидатите на СДСМ за овие општини, и вети дека од 1 јануари 2022, државата ќе ги покрива придонесите за првото вработување на секој млад до 29 години.
Вечерва на граѓанска трибина кај паркот во Мичурин,пред присутните граѓани, Заев ги промовираше носителот на кандидатската листата на советници во општина Аеродром на СДСМ и Коалицијата Александар Трајановски и кандидатот за градоначалник Александар Филиповски кој вети нови градинки, паркови, базени, Младински центар.
На вториот караван во Општина Гази Баба, потпретседателот на СДСМ Оливер Спасовски се обрати на граѓанска трибина во Стајковци, заедно со градоначалникот на Скопје, Петре Шилегов и градоначалникот и кандидат за втор мандат на СДСМ и Коалцијата за општина Гази Баба, Борис Георгиевски, кој вечерва пред жителите на Стајковци истакна дека лекцијата од 2016 година е научена за никогаш да не се повтори и најави низа проекти, меѓу кои и поставување на спомен обележје за жртвите од големата поплава.
Лукаревска во Чаир ја претстави советничката листа предводена од Марија Вељовска Кондовска, и го понуди најдоброто за развој на општината, за подобар живот на секој граѓанин, за поддршка на младите, на жените, на децата. За Социјалдемократскиот сојуз и коалицијата секој еден е важен, градиме општество еднакво и праведно за сите.
ВМРО-ДПМНЕ
На денешната прес конференција, Наташа Котлар, кандидат за градоначалник на Центар на ВМРО-ДПМНЕ го претстави проектот Иновативен парк, кој ќе биде наменет за младите луѓе, претприемачи кои што имаат иновативни и старт – ап компании кои се поврзани со своите креативни идеи на современиот пазар.
Кандидатот на ВМРО ДПМНЕ за градоначалник на Пехчево, Александар Китански, денеска на средба со жителите на с. Чифлик најави реализација на повеќе проекти.
Коалицијата предводена од ВМРО-ДПМНЕ изборната кампања „Создади нова иднина!“ пред симпатизерите и членството во Чаир, во отсуство на лидерот на партијата, Христијан Мицоски, вечерва ја претставија носителот на советничката листа за Скопје,Трајко Славевски, кандидатката за градоначалник на Скопје, Данела Арсова, потпретседателот на партијата Владо Мисајловси, кандидатот на советничката листа за Чаир, Ѓоко Велковски.
Пред центарци, програмата на партијата за локалните избори ја претставија потпретседателот на ВМРО ДПМНЕ, Александар Николовски, поранешниот градоначалник на Скопје, Коце Трајановски, Трајко Славевски и коалиционата партнерка Солза Грчева. Пред насобраните се обратија и носителот на советничка листа Игор Лазарев, како и кандидатката за градоначалник на Општина Центар, Наташа Котлар и кандидатката за градоначалник на Скопје, Данела Арсова.
ДУИ
Тетовската градоначалничка и кандидатка за нов мандат, Теута Арифи, порача дека во образованието во Тетово се планира наставниот процес во соновните училишта да се одвива само во една смена, подобрување на инфраструктурата и воведување нови и унапрадување на наставните процеси.
Демократската Унија за Интеграција денеска во Врапчишта, во присуство на лидерот на партијата, Али Ахмети и првиот заменик премиер Артан Груби ги претстави кандидатите за градоначалник и соетничката листа.
ДУИ од Теарце порачаа дека дивите депонии че бидат претворени во паркови. На централниот митинг пред седиштето на општината се претставија кандиатот за градоначалник, Нухи Незири и носителот на советничката листа Бесник Османи.
БЕСА
Движењето Беса ја претстави својата програма на средба со граѓаните на Бутел.
ГРОМ
Кандидатот на ГРОМ за градоначалник на општина Карпош Стевчо Јакимовски денеска најави продолжување на проектот „ Фасади за сите згради во општина Карпош“
ЗЕЛЕН ХУМАН ГРАД
ЗХГ и кандидатката за градоначалник за Град Скопје, Ана Петровска, одржаа прес конференција од населбата Трнодол, на тема „Дивоградби“.
ИЗБОРЕН РАПОРТ НА ЦИВИЛ #9:
Деветти ден и деветто издание на „Изборен рапорт“ на ЦИВИЛ во кое се застапени темите за падот на Фејсбук и реакцијата на шефот на Левица, за четвртиот насилен инцидент во кампањата, политичките злоупотреби на децата, препораките за заштита од КОВИД-19, фингерпринт апаратите и селекцијата на изборните набљудувачи на ЦИВИЛ.
СЕЛЕКЦИЈА НА ИЗБОРНИТЕ НАБЉУДУВАЧИ НА ЦИВИЛ
Откако заврши процесот на аплицирање, во тек е селекција на краткорочните набљудувачи на ЦИВИЛ, кои ќе го набљудуваат гласањето за локалните избори на 17 октомври.
Сите кандидати ќе бидат известени дали нивните апликации се прифатени или не најдоцна до утре, 6 октомври.
Веднаш потоа ќе следат информации за тоа како и каде ќе се одржат обуките.
Д.Мишев