Владата го прифати и усвои новиот Предлог-закон за прекинување на бременоста, кој ќе биде доставен до Собранието, а истиот е подготвен од Министерството за здравство.
Овој Предлог-закон претставува победа на правото на жената да одлучува за нејзиното тело и безбеден прекин на бременоста и укинување на постојните административни процедури-бариери кои го одолговлекуваа спроведувањето на постапката за прекин на бременоста.
„Со новиот Предлог-закон, на жената ќе и бидат овозможени комплетни, објективни и точни информации во врска со начинот на изведување на интервенцијата. Одлуката за прекин на бременоста, пациентката има можност да ја донесе свесно, без принуда од било кого, врз основа на објективни информации поврзани со интервенцијата, со посебна медицинска интервенција за која слободно одлучува бремената жена. Веќе нема да имаат потреба да чекаат три дена по советувањето, за да биде спроведена интервенцијата, нема да биде принудена да објаснува зошто сака да ја прекине бременоста и никој друг нема да решава прекинот на бременоста. Правото на жената за прекинување на бременоста е само нејзин избор.
Новиот Закон предвидува прекинувањето на бременоста да може да се изврши до истекување на дванаесеттата гестациска недела со писмена согласност од бремената жена. Ако бремената жена е малолетна или и е одземена деловната способност, прекинувањето на бременоста може да се изврши со писмена согласност од родителот, односно старателот на бремената жена.
Прекинот на бременоста може да се изврши по барање, и со писмена согласност од бремената жена и по истекот на дванаесеттата гестациска недела, во случаи кога врз основа на медицински индикации со кои ќе се утврди дека бременоста претставува опасност по животот или ќе доведе до тешко нарушување на здравјето на жената за време на бременоста, породувањето или по породувањето“, велат од Министерство за здравство.
Со оваа промена се укинуваат постојните процедури и бариери, а одлуката за прекин на бременоста е право на жената и тоа никој не може да и го одземе.
Изминатите години, на жените им беше отежнат овој процес, па тие требаа да минуваат низ низа процеси. Со тие одредби жените беа принудувани да да чекаат и да одат на задолжителни советувања, со што се кршеше правото на жената да одлучува. Минатата власт, која го донесе тој закон, водеше и пропаганда на главните медиуми со реклами со кои ги „советуваа“ жените да не го прават тој чекор.
А. Петровска
