Мобилните тимови на ЦИВИЛ – Центар за слобода, од 24-ти февруари до 6-ти март, за само девет дена, на градските плоштади и на улиците во вкупно 29 општини, го презентираа проектот: “Напред!”. Целта на посетите е мобилизација на набљудувачи за престојните предвремени парламентарни избори. ЦИВИЛ ги информираше големиот број на заинтересирани граѓанки и граѓани за можноста да ги мониторираат изборите, да пријавуваат неправилности и да се вклучуваат во тековните активности во контекст на изборите, на кои ЦИВИЛ секојдневно работи.
Покрај големиот интерес кај жителите на сите општини кои беа посетени, локалните и регионалните медиуми, ги следеа активностите на ЦИВИЛ во своите градови, и навремено известуваа.
Презентацијата на проектот: “Напред!”, започна од Велес, и беше дел од дневникот на ТВ Канал 21. Исто така, простор за мобилизацијата на набљудувачи во Велес, беше овозможен на локалната ТВ Здравкин, како и на веб порталите Ти реков, ми рече и Дума. Сите медиуми преку изјавата на претседателот на ЦИВИЛ, Џабир Дерала, ги известија велешани за можноста која ја нуди ЦИВИЛ, за условите за пријавување, како и за моменталната политичка ситуација, и условите кои треба да се исполнат за фер и демократски избори.
Во Куманово, јавниот настан на градскиот плоштад: “Нова Југославија”, го проследи кумановската телевизија ТВ Плус. На повикот до националните ТВ станици од Скопје, да испратат новинари, во организација на ЦИВИЛ, да известуваат за кумановскиот настан, одговори ТВ 21, чија екипа дојде на плоштадот. Во дневникот на ТВ 21, објавени беа активностите на ЦИВИЛ во Куманово, и можноста да се биде дел од тимот на набљудувачи.
За активностите на ЦИВИЛ, во Штип известија локалните телевизии ТВ Ирис и ТВ Стар. Тие ја објавија изјавата на Биљана Јордановска, која зборуваше за важноста што повеќе луѓе да бидат вклучени во набљудување и известување за изборните нерегуларности, со цел обезбедување кредибилни избори.
Настанот на ЦИВИЛ плоштадот во Прилеп, беше проследен од ТВ Канал Визија и објавен на веб порталите Патоказ и 10 без 10. Преку изјавите на Џабир Дерала, главниот уредник Синиша Станковиќ и Марија Теговска, прилепчани имаа можност да добијат информации за проектот: “Напред!”, впечатоците кои ЦИВИЛ ги добива од работата на терен, како и за актуелните политички настани во Македонија.
ТВ Мега, од Битола продолжува редовно да ги следи активностите на ЦИВИЛ. И овој пат, во саботното издание на дневникот, објавена беше изјавата на претседателот на ЦИВИЛ, кој зборуваше за мобилизацијата на набљудувачи во Битола. Караванот на ЦИВИЛ во пелагонискиот регион, беше дел од текстот и во веб порталот Шеталиште.
Веб порталот Ohrid News, ја објави презентацијата на проектот: “Напред!” во Охрид, и ставот на ЦИВИЛ, за актуелните меѓуетнички и меѓуврски случувања во земјава. За охридскиот јавен настан извести и охридската ТВ Морис.
ТВ Ускана, извести за активностите на ЦИВИЛ во Кичево и ја објави изјавата на Петрит Сарачини, кој зборуваше за потребата за набљудувачи и од кичевскиот регион.
Во Тетово, проектните активности на ЦИВИЛ, беа проследени од повеќе локални и национални медиуми кои прикажуваат програма на македонски и на албански јазик. Телевизија Кис, ТВ Арт, Телевизија Коха, МТВ 2, како и веб порталот Portalb.
Тимот на ЦИВИЛ, по посетата на Тетово, ја посети општина Гостивар. Јавниот настан на гостиварскиот градски плоштад беше објавен на ТВ Глоби, на албански јазик.
На јавниот настан во Кочани, присуствуваа телевизијата Канал плус и локалната кочанска телевизија Канал 8.
Активностите на ЦИВИЛ, во Струмица, Гевгелија и Валандово, беа најавени на ТВ канал ВИС. Настанот во Струмица, беше проследен и од регионалната Телеканал А1 и од ТВ Интел.
Јавните настани во сите 29 општини, се дел од проектот: “Напред!”. Со стотици акредитирани набљудувачи, над 1.000 граѓански набљудувачи и врвен тим на аналитичари и експерти, „Напред!“ е проект за долгорочен мониторинг на изборниот процес, набљудување на денот на изборите, едукација и јакнење на јавната свест за правата на гласачите.
Проектот се спроведува на национално ниво во 14 регионални центри на ЦИВИЛ и е финансиран со германски средства од Пактот за стабилност на Југоисточна Европа.
