Од извици и песната „Македонија цела да е!“ – до детски песнички за Хан, се слушаа на денешниот протест на иницијативата „За заедничка Македонија“. Граѓански новинар кој посака да остане анонимен, испрати до ЦИВИЛ – Центар за слобода фото и видео-материјал од денешните протести пред ЕУ Инфо центарот, каде се очекуваше да пристигне еврокомесарот Јоханес Хан.
Со камиони и труби присутните го пречекаа Хан.
„Нема Илирида, нема БЈРМ, само Македонија!“, порача еден од присутните демонстранти. Други демонстранти ја пееја песната „Една мисла имаме“, додека една повозрасна граѓанка му испеја на Хан своја верзија од една детска песна.
Дел од присутните лепеа плакати со натпис „НЕ у ЕУ!“. Откако им ја потврдија информацијата дека Хан повеќе не е во зградата на ЕУ Инфо центарот, присутните на протестот се упатија кон Собранието: „Од позади го изнесоа, ајде!“ повика еден од присутните.
