Уште една, веќе шеста жртва во КПД „Идризово“ за изминативе шест месеци! Последниот смртен случај е на осуденичка, за која, од затворот велат дека откако ѝ се слошило, била повикана Брза помош, која констатирала смрт, бидејќи во затворот нема дежурен лекар.
Директорот на затворот, Живко Пејковски, за порталот „Сакамдакажам“ изјави дека на 1.800 затвореници, има само двајца лекари и две медицински сестри!? Од осудените лица, 450 се зависници од дрога, а над 150 се психички болни. Директорот вели дека „Идризово“ со години плаќа огромни суми пари по клиниките, зашто затворениците сè уште немаат здравствено осигурување, иако тоа право им беше со закон уредено. Но, Министерството за здравство не го спроведувало законот повеќе од две години.
Пред извесен период во разговор за ЦИВИЛ Медиа, правниот советник на Хелсиншкиот комитет, Воислав Стојановски, изјави дека најголем проблем во затворите е пренатрупаноста и недостатокот на медицински персонал. Тој додаде дека за едно легло во затворите има по двајца затвореници и дека медицинскиот персонал не може да постигне да им излезе во пресрет на сите, затоа што работи само една смена. Исто така, додаде дека „пренатрупаноста во затворите ќе се намалела доколку се воведеше Закон за пробација, со кој, осудените лица казната ќе ја извршуваа во домашен притвор, со носење на алка за следење“.
Стојановски истакна дека итно треба да се воведе 24 часа присутен медицински персонал во затворите и да им се овозможи на невладините организации и медиумите да вршат независен надзор во затворите, како и да имаат можност да разговараат со затворениците. Затоа што, според него, последниве години, од Управата за извршување на санкции, освен на Народниот правобранител, никому не му се дозволува да влезе во затворите. „Од Комисијата за превенција од тортура на ОН, во Македонија доаѓаат секои две години, а треба да доаѓаат на секои четири години. Тоа покажува колку лоши услови има во македонските затвори“, ни ијзави Стојановски.
Народниот правобранител Иџет Мемети покрена постапки за сите смртни случаи од почетокот на годинава. И тој изјавуваше дека затворениците умираат и поради лошата здравствена заштита.
Починатата жена била осудена на осумгодишна затворска казна за посредување во проституција на малолетни лица. Во февруари, притвореникот Р.А. од Струмица починал во затворот „Скопје“. Претходно, во јануари, во Казнено–поправниот дом „Идризово“, почина затвореникот М. С. (46). Истиот месец, на 10-ти и 11-ти јануари, починаа 73 -годишникот М.А. од Гостивар и 56 -годишникот С.Р. од гостиварското село Речане, кои исто така, служеле затворска казна во „Идризово“. Состојбата во македонските затвори е повеќе од алармантна!
ЦИВИЛ – Центар за слобода со години ги повикува институциите да преземат итни мерки за подобрување на условите во затворите, за почитување на човековите права на притворените лица и затворениците и за укинување на тортурата во притворите и затворите во Република Македонија. Со години, притворот се користи како сурова казнена мерка. Ова се само дел од наодите и согледувањата на експертите за состојбите во оваа сфера.
Д. Муратов
