Таткото на 21 годишниот Андриас Реџепов од Шуто Оризари, кој пред четири дена почина во затворот во Идризово, во разговор за ЦИВИЛ Медиа, вели дека има сомнежи оти лица од службите во затворот се виновни за неговата смрт. Тој бара итно да се расветли случајот и да се откријат вистинските причини за смртта, бидејќи наводно, имал сведоштво од анонимен затвореник кој тврдел дека момчето „го претепале командири“.
„Другарите на син ми од затвор ми се јавија дека син ми е во болница. Кога пристигнав во болница не ми дозволија да го видам. Потоа, кога отидовме во затворот во Идризово, не известија дека син ми почина, тоа беше шок за нас. Пред два дена го погребавме едниот син, но мислите ми се кај другиот, 22-годишен син кој остана во затворот во Идризово, се плашам и нему да не му се случи нешто“, вели за ЦИВИЛ Медиа, Нехру Реџепов, таткото на починатиот.
Активистот Геге Демировски, за ЦИВИЛ Медиа истакна дека има докази кои укажуваат дека момчето е тепано во затворот.
„Апелирам до сите надлежни институции да го расчистат случајот, во спротивно ќе излезат илјадници Роми на протест пред Министерство за правда на Република Македонија“, додава Демировски.
Од Европскиот центар за правата на Ромите (ЕРРЦ), Будимпешта, велат дека будно го следат случајот на починатото 21-годишно момче.
„Со цел итно разрешување на случајот, ЕРРЦ подготви писмо и утре ќе биде упатено до сите надлежни институции и ќе се бара итно да изнесат официјални податоци за случајот (детален извештај од направената обдукција, извештај од местото од истражен судија и форензичар, детален токсиколошки извештај), како и започнување итна истрага на Јавниот обвинител на Република Македонија по службена должност, и обезбедување праведна компензација и поддршка на семејството на починатиот. ЕРРЦ ќе продолжи будно да ги следи сите настани во поглед на овој случај и во ситуација на непрофесионално и неневремено вршење на должностите од надлежните органи, ќе поведеме тужба пред националните и меѓународните судови“, изјави за ЦИВИЛ Медиа, правничката Сенада Сали, од Европскиот центар за правата на Ромите (ЕРРЦ), Будимпешта.
Од Хелсиншкиот комитет за човекови права поднеле барање до Комисија за слободен пристап за информации од јавен карактер, да добијат податок колку затвореници починаа во последните три години во сите затвори во Македонија. Правниот советник на Хелсиншкиот комитет, Воислав Стојановски, за ЦИВИЛ Медиа вели дека најголем проблем во затворите е пренатрупаноста и недостатокот на медицински персонал. Тој додава дека за едно легло во затворите има по двајца затвореници и медицинскиот персонал не може да постигне да им излезе во пресрет на сите, затоа што работи само една смена.
„Во последните 6 месеци починаа 7 затвореници во затворот Идризово. Пред три-четири дена, почина едно момче и чекаме да ги видиме резултатите од обдукцијата, за да дадеме коментар за тој случај. Сметам дека Обвинителството треба јавно да ги соопшти резултатите од обдукцијата и да ја информира јавноста, бидејќи тоа е од јавен интерес. Досега немавме јавно соопштување на резултатите. Пренатрупаноста во затворите ќе се намалеше доколку се воведеше Закон за пробација, сокој, осудените лица казната ќе ја извршуваа во домашен притвор, со носење на алка за следење“, вели Стојановски.
Тој вели дека итно треба да се воведе 24 часа присутен медицински персонал во затворите и да им се овозможи на невладините организации и медиумите да вршат независен надзор во затворите и да имаат можност да разговараат со затворениците. Затоа што, последниве години, од Управата за извршување на санкции, освен на Народниот правобранител, никому не му дозволуваат да влезат во затворите.
„Од Комисијата за превенција од тортура на ОН, во Македонија доаѓаат секои 2 години, а треба да доаѓаат на секои 4 години. Тоа покажува колку лоши услови има во македонските затвори“, додава Стојановски.
Од затворската управа ги отфрлуваат обвинувањата.
Текст и камера: Дехран Муратов
Монтажа: Ермин Климента
