ВЕСТ НА ДЕНОТ: Владата ќе обезбеди покривање придонеси на плата за новинарите и медиумските работници
Владата, по консултации со ССНМ, донела одлука да обезбедат средства за целосно покривање на придонесите на плата на вработените во медиумите, вклучувајќи ги телевизиските и радио дифузерите, печатените медиуми, како и електронските интернет портали.
Мерката ќе може да ја искористат само медиумите кои не отпуштиле ниту еден работник, а нема да смеат ниту додека ја користат субвенцијата, кои ќе ги вратат на првичното ниво платите намалени поради кризата и кои имаат најмалку тројца постојано вработени, нагласи вицепремиерот Бујар Османи.
ФЛЕШ ВЕСТИ
Во последните 24 часа се направени 971 тестирања, а регистрирани се 175 нови случаи на КОВИД-19, петмина починати и 18 оздравени.
Министерот за здравство Венко Филипче на денешната прес-конференција истакна дека во Охрид на семејна прослава со 200 гости, 8 се позитивни на КОВИД-19, а 40 контакти се во изолација, на свадба во Скопје со 100 присутни, 14 се позитивни, но надлежните имаат проблем со соработката на присутните, кои не кажуваат точни информации.
Претседателот на државата Стево Пендаровски утре ќе има обраќање во кое ќе ги соопшти своите ставови во врска со вонредната состојба, евентуална лидерска средба, и за изборите.
ОЈО Скопје ја отфрли кривичната пријава против градоначалникот на Општина Сарај за кривични дела – Злоупотреба на службената положба и овластување од член 353 став 1 и Несовесно работење во службата од член 353-в став 1 од Кривичниот законик, поднесена од Државната комисија за спречување на корупцијата.
ДИК ја очекува официјално Уредбата со законска сила донесена синоќа од техничката Влада, со која се продолжуваат изборните дејствија за предвремените парламентарни избори.
„Домашната платежна картичка „Купувам домашно“ ќе ја добијат 324.479 граѓани, 28 милиони евра пари за граѓаните, наменети за купување домашни производи и услуги за рестартирање на македонската економија“, напиша Оливер Спасовски на Фејсбук.
Османи оптимист за договор, ВМРО-ДПМНЕ калкулира, ДИК чека владина Уредба за избори
Вицепремиерот Бујар Османи се согласува со еврокомесарот Оливер Вархеји дека се потребни фер, демократски и инклузивни избори, со земање предвид и на состојбата со пандемијата предизвикана од коронавирусот.
ВМРО-ДПМНЕ засега останува на своите ставови во врска со предвремените парламентарни избори. По синоќешната владина Уредба за продолжување на изборните дејствија за изборите, партијата за МИА нагласува дека за нив е најважно здравјето на граѓаните.
Советникот на ДУИ во Ресен преминува во Движењето БЕСА
Единствениот советник Албанец избран во листата на ДУИ во Ресен од денес ќе ги претставува политиките на Движењето БЕСА.
Албански премиер во договор со ВМРО?!
Сашо Орданоски
Можно е јас нешто и да сум пропуштил, но не видов некоја значајна – всушност, не видов никаква – реакција од страна на опозицијата по повод најавата на Али Ахмети дека ќе инсистира новиот премиер на следната влада да биде Албанец?! Не е таа изјава секојдневна, за така очигледно политички да се одмолчи…
Не е само ВМРО-ДПМНЕ кое е единствениот политички фактор во земјава што нема став за таа работа, туку ни еден од македонските десничарски колумнисти и коментатори, како по некаков договор, деновиве не напишаа ни еден став за таа значајна најава на ДУИ. А меѓу тие коментатори има доволен број на македонски националистички хистерици (башка, сите големи експерти за епидемиологија) кои и за многу подребни „национални“ провокации знаеле да се размавтаат со кубури и барјаци, повикувајќи на национални востанија и меѓунационални пресметки.
А. Петровска
