Законот за зголемување на минималната плата, со кој официјално треба да започне исплатата на минималната плата во износ од 12.000 денари, на вчерашната седница на Собранието на Република Македонија беше изгласан со 70 гласа „за“, без воздржани и против.
Со месечно издвојување на 1.5 милиони евра буџетски средства, се очекува сите работници, вклучително и вработените во кожарската, текстилната и индустријата за обувки да добиваат месечна плата од минимум 12.000 денари.
Од ВМРО-ДПМНЕ посочија дека законот е наменет за предизборни цели, со цел СДСМ да ја придобие работничката класа за локалните избори.
СДСМ ги негираше овие обвинувања, пред сѐ, затоа што и овој закон е дел од Планот 3-6-9, за подобрување на социјалната слика во земјата, што за нив, како лево ориентирана партија, е приоритет.
Седницата помина со меѓусебни препукувања, збор земаа триесетина пратеници, а опозицијата на крајот, реши да го поддржи Законот за минимална плата.
На својот Фејсбук профил, еден од иницијаторите на овој закон, професорот Бранимир Јовановиќ, изјави дека ова зголемување го смета и за мал личен успех.
„Останува мала горчина заради тоа што не се укина одредбата со која минималната плата важи само за оние работници кои ќе ја исполнат нормата, одредба која честопати се злоупотребуваше за на работниците да им се исплаќа плата пониска од минималната… Сепак, веројатно ќе беше премногу и да се зголеми минималната плата за 30% и да се укине нормата. Дополнителна утеха е и тоа што сега, нормата нема да може да се постави без согласност од работниците… Напорите во наредниот период, и на синдикатите, и на сите борци за работнички права, ќе треба да бидат фокусирани на ова, на укинувањето на одредбата за нормата“, стои во статусот на Јовановиќ.
За тоа, што всушност, мислат самите работници кои секојдневно се борат за своите права и дали во пракса сите ќе бидат изедначени или пак, постои шанса за манипулација со законските одредби, посебно со одредбата за исполнување на нормата за да се добие минималец од 12.000 денари, ЦИВИЛ Медиа разговараше со Кристина Ампева од здружението „Гласен текстилец“.
„За нас, како активисти и работници од текстилната, кожарската и чевларската индустрија, вчера беше разочарување, што и покрај сите наши заложби, остана ‘учинокот’ во новиот закон за минимална плата. Знаејќи ја ситуацијата од изминатите години, експлоатацијата и манипулацијата врз овие работници (со секоја чест на ретки исклучоци), се надеваме дека нашите стравови ќе бидат неоправдани…
Се надеваме дека законот ќе се имплементира онака како што Владата го има замислено, за добробит на работниците. Ние остануваме будно да ја следиме состојбата при исплатата на платите. Ќе алармираме за секое прекршување како и досега. За имплементирањето на законот, очекуваме дека институциите ќе се заземат и ќе ги засилат контролите, сѐ со цел – спречување на евентуална манипулација со учинокот. ‘Гласен Текстилец’ продолжува со работа за заштита на правата на овие работници, и еве, испраќаме апел до институциите и работодавачите, да се придржуваат до законите“, изјави Ампева за ЦИВИЛ Медиа.
Останува прашањето колкумина од околу 130.000 работници, ќе успеат на први и да ја добијат минималната плата од 12.000 денари?
Биљана Јордановска
