пишува: САШО ОРДАНОСКИ
Се разбира дека на Каракачанов не треба ништо да му се верува!
За жал, тоа важи и за неколку имиња од првенците на ВМРО-ДПМНЕ кои се најдоа на неговата „листа“ на издадени бугарски пасоши. Иста мета, исто отстојание.
Зошто?
Бидејќи ВМРО-ДПМНЕ со години работи на индустриско ширење лаги и пропагандни кампањи за дискредитација на своите политички противници. Два-тројца од објавените имиња се апостолите на овој проект на опозицијата кој спаѓа во најопасните „биолошки оружја“ против демократијата: вештачки произведен вирус, кој метастазира како најопасен карцином, што систематски ја поткопува довербата во општеството и смислата на јавната дебата.
Не треба сега тие да се лутат и да протестираат кога се жртви на оваа долна провокација на Каракачанов наменета за нивна политичка компромитација. Оти, целата пропагандна опозициска машинерија ревносно и алармантно ги пренесуваше, засилени со партиски соопштенија и апокалиптични прес-конференции, сите националистички навреди и клевети на Каракачанов кога им одговараше да покажат дека политиката за добрососедство на Заев не дава резултати и дека е „предавничка“ – да, тогаш го ценеа и фактот на официјалната позиција на Каракачанов како потпретседател на Бугарската влада. Ама, тој и сега е истиот и на истата позиција (да се надеваме, не за долго), само што целта не му е Заев и неговата политика, туку пропагандниот „демолишн бенд“ од врвот на „побратимите“ од македонското ВМРО.
А, всушност, на злобата на Каракачанов целта секогаш му се Македонците и Македонија. Тоа не треба да се заборава во овдешните меѓупартиски препукувања. Каракачанов е регистриран соработник на бугарските тајни служби, од кои бугарскиот претседател Радев минатата недела официјално побара вклучување во заштита на „бугарските интереси“ во Македонија. И тоа не треба да се заборава во овдешните меѓупартиски препукувања.
Дотолку повеќе што паралелно со „увезената“ вмровска афера од Бугарија, се одвива и „увезената“ афера од Италија, повторно низ проверениот меѓународен пропаганден канал на крајно-десничарските другарчиња од „Ла верита“. Пак ли се истите „кики-фрики“ интереси, цели, финансиери и логистика како и минатиот пат во прашање? И тогаш имаше бугарски замешателства; и тогаш Антонио Милошоски беше главниот портпарол за објаснување на аферата; и тогаш целта беше да се руши власта со голем ентузијазам…
Но, набавката на вакцините – односно, ненабавката – е многу сериозна тема за да може да помине само со грубите обвинувања од опозицијата и демантите од власта. Со оглед на глобалниот хаос со набавката на вакцините, феноменот на посредници во вакви набавки можеби не е невообичаен, но со оглед на политичката и здравствената чувствителност на темата, неопходно е да се расчистат сите поединости на оваа (неуспешна) операција. И тоа пред да се изнаслушаме дваесетина партиски прес-конференции и двојно повеќе теории на заговор.
Додека шефот на јавните обвинители го нема никаде, претседателката на Комисијата за спречување корупција веднаш изјави дека тие ќе го разгледаат случајот и набрзо ќе решат дали има потреба да покренат постапка. Што чека Обвинителството?
Сите права се задржани. ЛИНК: Услови за користење, авторски права и заштита на приватноста. Текстот е личен став на Авторот.
