Претпладнево, УЕФА го одби барањето на градските власти на Минхен да се обои Алијанц Арената во боите на виножитото за време на натпреварот Германија-Унгарија од ЕУРО2020. Главното раководно тело на европскиот фудбал го одби барањето на националниот тим поради „политички контекст“.
„Расизмот, хомофобијата, сексизмот и сите форми на дискриминација се дамка врз нашите општества – и претставуваат еден од најголемите проблеми со кои се соочува играта денес“, се наведува во соопштението објавено од главното раководно тело на европскиот фудбал.
„Дискриминаторското однесување ги наруши и самите натпревари и, надвор од стадионите, онлајн дискурсот околу спортот што го сакаме. Сепак УЕФА, преку своите статути, е политички и религиозно неутрална организација. Со оглед на политичкиот контекст на ова специфично барање – порака со цел одлука донесена од унгарскиот национален парламент – УЕФА мора да го одбие ова барање“, се вели во одлуката од УЕФА.
Претходно градските советници во главниот град на Баварија за мечот Германија-Унгарија на Евро 2020 во среда во Минхен, планираа да го осветлат стадионот со бои на виножито. Ова требаше да биде симболичен протест против неодамнешното донесување на закон за забрана за промовирање на хомосексуалноста во Унгарија. Познатата Алијанц Арена требаше да блесне со боите на ЛГБТИ за време на натпреварот, а чинот ќе беше за да се обесчести политиката на унгарскиот премиер Виктор Орбан.
„Градот Минхен ја поддржува различноста, толеранцијата и вистинската еднаквост во спортот и општеството“, стоеше во заедничката нацрт-одлука на сите шест партиски фракции во Градскиот совет во Минхен, упатена до градоначалникот на Минхен, Дитер Рајтер. По повод натпреварот меѓу Германија и Унгарија, градскиот совет сакаше да испрати видлива порака на солидарност до ЛГБТИ заедницата во Унгарија, која трпи последици од неодамнешниот закон инициран од владата на Орбан.
Унгарија на 15 јуни го усвои предлог-законот за забрана на „промовирање“ на хомосексуалноста кај малолетните лица, предизвикувајќи загриженост на активистите за човекови права, во услови на зголемени ограничувања наметнати од конзервативната влада на премиерот Виктор Орбан кон ЛГБТИ заедницата.
Ј. Ѓ.
