ЏАБИР ДЕРАЛА
Од денот на своето основање, 25 ноември 1999 година, ЦИВИЛ е една од оние граѓански организации чиј прв и највисок интерес се човековите права и слободи. Тоа е организација која и во своите основни документи, меѓу кои и Статутот на ЦИВИЛ, ја подразбираат Универзалната декларација за човековите права и доследно ја почитуваат во нејзината целовитост:
Со самиот факт што се родил како човек, секој поединец на овој свет ги ужива сите човекови права и слободи, без исклучок и целосно.
Член 1 од Универзалната декларација за човекови права: Сите човечки суштества се раѓаат слободни и еднакви по достоинство и права. Тие се обдарени со разум и совест и треба да се однесуваат еден кон друг во духот на општочовечка припадност.
Тоа за нас, ЦИВИЛите, не е само декларација, туку е дел од нашите животи, нашите вредности и нашите секојдневни заложби. Искрено, посветено и бескомпромисно, веќе 23 години се залагаме за човековите права и слободи, за хуманизмот, за прогресивно и демократско општество во кое се почитуваат различностите и во кое нема место за дискриминација, манипулации и насилство по било која основа.
За определбите и работата на ЦИВИЛ сведочат повеќе од 100 успешно спроведени проекти во повеќе меѓусебно поврзани области. Во своите проекти, ЦИВИЛ ги промовира европските вредности, мултикултурализмот и недискриминацијата.
Со своите проекти и организациска поставеност, ЦИВИЛ стана една од најпознатите организации во земјата и во регионот во борбата против дезинформациите, пропагандата и хибридните закани против демократијата.
Понатаму, мониторингот на изборите стана уште еден заштитен знак на организацијата, широко прифатена од сите граѓанки и граѓани во земјата.
Зелената ориентација на организацијата датира од самиот почеток и денес претставува јавен ресурс за едукација и промоција на зелените вредности, политики и практики.
Организацијата е меѓународно позната и призната во борбата против оруженото насилство, пролиферацијата на нелегалното оружје и култот кон оружјето.
Медиумската платформа на ЦИВИЛ, основана во 2009 година, денес претставува простор за информирање, едукација, анализи, истражување и општествено политички дијалог. Воедно, организацијата се појавува и како ресурс за развој на прогресивните медиуми и јавен ресурс во кој креаторите на јавното мислење можат слободно да ги изразат своите ставови и убедувања.
Може да се набројуваат уште проекти и области во кои ЦИВИЛ се појавува како носител на идеи и активности кои се поврзани со суштински интереси, права и слободи на сите граѓанки и граѓани во земјата, но и многу пошироко.
Не еднаш е кажано дека ЦИВИЛ е исклучително мобилна и отворена организација, секогаш и насекаде во непосредна комуникација со граѓанките и граѓаните. Веројатно нема населено место во земјава во кое ЦИВИЛ не бил присутно со свои активности, вклучително и мониторинг на изборните и/или политичките процеси и настани. И тоа секогаш биле активности во кои учествуваат самите граѓанки и граѓани.
ЦИВИЛ учествува или води проекти и во регионот и пошироко. Такви се проектите во доменот на борбата против дезинформациите и пропагандата, како и против дејствувањето на крајната десница. Во портфолиото на организацијата влегуваат проекти чии активности се спроведуваат во Косово, Србија, Грција, БиХ, Германија и други земји низ Европа.
Од самиот почеток на целосната руска агресија против Украина и против демократскиот свет, ЦИВИЛ е највидливата и највлијателната организација која се бори против руската воинствена пропаганда и хибридните напади. ЦИВИЛ е меѓу првите во светот и прва во земјата со недвосмислена и најостра осуда на руската агресија против Украина и против демократијата во светот.
Нашите вредности и определби ги градиме и ги браниме без калкулации и без компромис. По цена на нашето здравје и безбедност, ние секој ден стоиме исправени пред најголемите предизвици за општеството.
Секој ден во ЦИВИЛ започнува со неизвесност – колку нашите стремежи, вредности и заложби ќе успееме да ги претвориме во реалност. Тоа е секојдневна борба. Спремни сме да ја водиме докрај. Годишнината на ЦИВИЛ е свечен чин за десетици илјади граѓанки и граѓани што биле и се вклучени во работата на организацијата.
Еднаш ЦИВИЛ, секогаш ЦИВИЛ! Нека ни е честито!
