Заев: Јас ќе ја водам кампањата и ќе бидам кандидат за премиер
Премиерот Зоран Заев денеска изјави дека на претстојните парламентарни избори во април следната година повторно ќе биде кандидат за премерското место.
„Јас барам нов, чист, цел мандат за да продолжиме. Сега топката е кај граѓаните и тие ќе ја дадат насоката по која треба да се движиме. СДСМ ќе излезе со модернизарен тим и модернизирана програма“, рече Заев.
Ратификација од уште четири земји-членки ја делат Северна Македонија од влезот во НАТО
Со ратификацијата на Протоколот за пристап на Северна Македонија во НАТО, од Соединетите Американски држави, остануваат уште четири земји членки да го ратификуваат истиот за, конечно, целата процедура да заврши со потпишување и ратификација на Договорот во Собранието на Северна Македонија. До сега, Договорот го ратификуваа 25 земји членки, и тоа: Албанија, Данска, Полска, Грција, Турција, Белгија, Германија, Португалија, Естонија, Луксембург, Бугарија, Летонија, Романија, Канада, Италија, Хрватска, Литванија, Словачка, Унгарија, Велика Британија, Црна Гора, Норвешка, Словенија, Република Чешка и последно, Соединетите Американски Држави.
Остануваат уште четири држави кои треба да го ратификуваат Пристапот на земјата во НАТО Алијансата. Тоа се Исланд, Франција, Холандија и Шпанија.
ФЛЕШ ВЕСТИ
Шест години од протестите за новинарот Томислав Кежаровски кога стотици граѓан(к)и, новинари и граѓански активисти беа спречени од страна на полициски сили да одржат мирен протест пред Музејот на македонската борба за државност и самостојност, поради казнувањето на новинарот.
Германскиот амбасадор во земјава, Томас Герберих, во врска со одлуката на Советот на ЕУ да не започне преговори со Северна Македонија, рече дека земјава е дел од Европа и не заслужува ништо помалку од целосно членство во Европската Унија.
Шекеринска: Северна Македонија направи сè, ЕУ не испорача тоа што вети
Премиерот Зоран Заев смета дека најавата за вонредна резолуција на Европскиот парламент со која повторно ќе се побара отворање на пристапните преговори за членство на Северна Македонија и Албанија во ЕУ ќе биде од помош и ја врати мотивацијата кај нашиот народ да продолжи по европскиот пат.
ЦИВИЛНИ АКТИВНОСТИ
ЦИВИЛ со конференција „Зелените доаѓаат“
Конференцијата „Зелените доаѓаат!“ во организација на ЦИВИЛ ќе се одржи во петок, на 25 октомври во хотел „Порта“ (Аеродром) од 12 до 14 часот. На конференцијата се поканети граѓански организации и иницијативи, политички партии, институции на национално и локално ниво, медиуми и сите заинтересирани граѓанки и граѓани.
Максим Димитриевски и Митко Јанчев, градоначалниците на Куманово и Кавадарци, Арта Точи, пратеничка во Собранието на РСМ, Арианит Џафери, Екогерила, Ванчо Орданоски, ИТ експерт, Даница Павловска – Циги, експертка за архитектура и просторно планирање, Џабир Дерала, Диана Тахири и Биљана Јордановска од ЦИВИЛ се говорници во првиот дел од конференцијата кои се потврдени до сега.
Сарачини: Феноменот на неказнивост ги охрабрува мразачите!
„Говорот на омраза е најзастапен на социјалните мрежи, најчесто е генериран од самите корисници, меѓутоа и од други ентитети како што се медиуми, комерцијални или политички ентитети кои создаваат содржини и ги пласираат на социјалните мрежи. Потоа доаѓаат порталите кои објавуваат информации, дел од тие вебпортали се професионални, меѓутоа има дел од порталите кои се непрофесионални и се вон сите новинарски стандард“, вели Петрит Сарачини, новинар и медиумски истражувач, во разговор за ЦИВИЛ Медиа.
МИСЛА
„Ментален затвор“ за борците за човекови права и слободи во „судница во главниот град на една мала, сиромашна и напатена земја“, пресуда во полза на „човечкиот морален отпад, да извршуваат валкани задачи за грст нечесно стекнати сребреници што им ги фрла криминалната банда која лажно се претставува како политичка елита“, вистинска приказна на Џабир Дерала.
„A кој воопшто рекол дека мора“, вели Зоран Иванов, разглобувајќи го прашањето за тоа дали Македонија дома може да се нарекува само Македонија и колку таа тема е бесполезна увезената дилема.
„Целата ова ујдурма од Грција, во наменски пакет на сеирџиството од недобивањето датум за преговори, еве, се пренесува и кај нас. Ама и паничарите во Грција и сеирџиите во Македонија го игнорираат клучниот факт дека името на нашата држава е сега Северна Македонија. И дома и надвор. Службено не службено, доброволно, не доброволно, присилно, не присилно, сакале, не сакале, тоа е“, пишува Иванов.
Членови на текстилниот кластер (работодавачи) вчера дискутирале за покачувањето на минималната плата…, и муабетот се свел на „Лошиот работник“ наспроти „добрите работодавци“ – сè за 14.000 минимална плата, вели Симона М. Живкова.
„Се водела бурна дебата меѓу „текстилците“ за 14.000 денари и веќе точно знаеме што нѐ чека од јануари: враќање пари на работодавците, притисоци, уцени, откази… Самото тоа што барате можност да кратите и од вака малите и јадни плати што ги давате, со сите манипулации, покажува дека вие сè уште мислите дека сте некоја посебна категорија граѓани и дека можете да си дозволите јавно да барате работниците да ви бидат робови, нивните деца да трпат за парче леб, додека вашите ги праќате на екскурзии низ светот од 16 години“, пишува Живкова.
Биљана Јорднаовска
во соработка со: Дехран Муратов, Маја Ивановска, Џабир Дерала, Симона М. Живкова, Зоран Иванов