ТЕМА НА ДЕНОТ
Половина милијарда за ветер(ници) во Штип – 100 милиони прашалници
„Градиме темели на промените. Доаѓа времето на Македонија“, вака премиерот Христијан Мицкоски ја претстави инвестицијата на „Алказар Енерџи“ како најголем проект за обновлива енергија во историјата на Северна Македонија, вреден половина милијарда долари. Според него, ветерниот парк ќе произведува 1 терават-час електрична енергија годишно, што ќе покрие околу 20% од домашното производство на струја и ќе донесе 100 милиони евра во БДП. Во јавноста се појавија и реакции од експертската заедница. Инженери и (пензионирани) професори предупредуваат на ризик од енергетска зависност и штетни договори за идните генерации.
Партијата Левица обвини за лажен маркетинг, тврдејќи дека проектот е комерцијален, а не во интерес на граѓаните, ќе произведува струја за извоз, а не за македонските домаќинства и дека државната компанија ЕСМ е запоставена, додека странски инвеститори добиваат приоритет. Останува прашањето: дали овие проекти се водат транспарентно и во јавен интерес, или се дел од затворени договори без целосна вклученост на засегнатите страни?
ИЗЈАВА НА ДЕНОТ
„Размислувавме за тоа пред три и пол години, кога донесовме одлука во Советот за национална безбедност, јас лично го напишав нејзиниот текст. Ќе продолжиме со нашата принципиелна политика на независна, суверена држава“, изјави Александар Вучиќ, додавајќи дека од 1 јули „никаде не сме извезле ниту еден куршум, па затоа никој не може да нè обвини за поттикнување воени конфликти“.
РЕГИОН
Последните два обиди на пратениците да го конституираат Собранието на Косово во сабота, 26.07. 2025, вклучително и седницата што се одржа доцна вечерта, околу 22 часот, повторно беа неуспешни, со што вкупно се забележани 54 неуспешни обиди. Причина: недостаток на политички консензус. Рокот од 30 дена што Уставниот суд им го даде на пратениците да го решат прашањето за конституирање на Собранието сега е истечен.
СВЕТ
Нова 10-часовна воена пауза на Израел во делови од Газа за да се овозможи испорака на помош
Втората 10-часовна пауза на воените активности на Израел започнува во делови од Газа за да се овозможи испорака на помош. Паузата доаѓа откако агенциите за помош предупредија за масовно гладување низ Газа – во недела, Светската здравствена организација соопшти дека неухранетоста достигнала „алармантно ниво“
АЛ-ПРЕС
Редакциски избор од албански медиуми: Косовските пратеници под казна од Уставниот суд; 12 години за тројца обвинети за напад врз ЦИК на северот на Косово; Мицкоски го брани идентитетот во Пустец; 15 милиони евра од ЕУ за албанската војска
ПРАШАЊЕ НА ДЕНОТ: Што мислите за враќањето на споменикот на Ќосето во Скопје?
СЛОБОДНА ЗОНА
„Утрово, споменикот на контроверзниот ликвидатор на ВМРО, кој си го убил и сопствениот брат, Андон Лазов-Ќосето, со кама в раката ги поздрави Скопјани од кружниот тек кај хотел „Континентал“, каде што беше поставен шверцерски, во текон на ноќта, од страна на градоначалничката Арсовска, како остварување на ветувањето дадено неколку месеци по стапување на функцијата. Дека сите други ветувања ги оствари, Скопје блеска, граѓаните се возат во нови климатизирани еколошки автобуси, па и остана само враќањето на Ќосето“, пишува Драган Мишев во „Ќосето“.
Подготви: Б. Јордановска
