ВЕСТ НА ДЕНОТ
Џафери достави предлог до Собранието за разрешување на министрите Меџити и Алиу
Техничкиот премиер Талат Џафери доставил допис до претседателот на Собранието Јован Митрески, во којшто, согласно член 94, став 2 од Уставот на Република Северна Македонија, предлага Собранието, на првата наредна седница, да ги разреши: Фатмир Меџити, од функцијата министер за здравство и Азир Алиу, од функцијата министер за информатичко општество и администрација, соопшти владината прес-служба.
Џафери доставил и допис до Митрески, согласно наведениот член од Уставот, Собранието да ги избере: Илир Демири, за министер кој ќе раководи со Министерството за здравство и Наим Бајрами, за министер кој ќе раководи со Министерството за информатичко општество и администрација.
ИЗЈАВА НА ДЕНОТ
Зајкова: Партиите да внимаваат со каква слика ќе влијаат на патот кон кој оди државата
„Сите партии треба да бидат многу внимателни во своите постапувања и каква слика се остава за државата и колку тоа ќе влијае на патот, по кој оди државата. Сите овие вакви несогласувања влијаат на нашата интеграција“, изјави пратеничката и лидерка на Либерално демократската партија Моника Зајкова.
ФЛЕШ ВЕСТИ
УСТАВЕН Со 65 гласа „за“, 26 „против“ и без воздржани, на 140-тата собраниска седница за судија на Уставниот суд на Република Северна Македонија е избрана Ана Павловска-Данева, професорка на Правниот факултет на Скопскиот универзитет.
ЕПИДЕМИЈА Министерот за здравство во техничката Влада, Фатмир Меџити денеска на брифинг со новинарите истакна дека ќе го потпише документот за прогласување епидемија на голема кашлица во Скопје, по вчерашната препорака на Комисијата за заразни болести.
КУЛТУРА Вкупните средства наменети за финансирање на проекти од национален интерес во културата за оваа година изнесуваат 867.600.000 денари или 14 милиони евра. Средства, меѓу другото, и оваа година има за одбележување на значајни јубилеи, за заштита на културното наследство, за Универзалната сала, како и за меѓународна афирмација на македонската култура.
ВОЈНА ВО УКРАИНА
Најмалку 8.000 луѓе загинаа во Мариупол од март 2022 до февруари 2023 година поради целосната инвазија на Русија на Украина, соопшти меѓународната организација за човекови права Хјуман рајтс воч (ХРВ) во извештајот објавен на нејзината веб-страница, пренесува Укринформ.
Извештајот се заснова на речиси двегодишно истражување спроведено од Human Rights Watch и Truth Hounds, водечка украинска организација за човекови права, како и 3D реконструкции и визуелни и просторни анализи од SITU Research.
КОНФЛИКТИ
Меѓународниот аларм се зголемува пред очекуваниот израелски копнен напад во Рафах, град на југот на Газа, блиску до границата со Египет, каде што многу раселени луѓе кои живеат во енклавата побараа засолниште.
Се проценува дека еден милион луѓе се сместени во град со шатори, а сателитски снимки покажуваат дека импровизираното засолниште брзо се шири, пренесува Си-Ен-Ен.
АЛ-ПРЕС
Советот на Европа излезе со критики за преоптовареноста на системот за притвор во Албанија. Според официјалната статистика, популацијата во притвор е висока веќе две децении и денес е околу 30% над европскиот просек, пишуваат албанските медиуми.
На барање на Србија, денеска ќе се одржи Вонредната седница на Советот за безбедност на ОН за ситуацијата во Косово… пишуваат косовските медиуми.
Ова се дел од темите од денешниот редакциски избор на ЦИВИЛ Медиа, од албанските медиуми во регионот.
ЕДУКАЦИЈА
СЛОБОДНА ЗОНА
„Со лелекот или крикот, сеедно, на двајцата актуелни министри од редот на политичката партија и коалициски партнер на СДСМ и ДУИ во македонската, техничка па сепак влада на вечерашниов прес, и колку раскажаната приказна на двајцата министри од Алијансата, Алиу и Меџити пред новинарите и да беше еднострана, веќе на самиот свој старт, креирајќи го ваквиот амбиент, владата на Џафери го допре самото институционално дно…“, од Зоран Иванов по допрен глас „Влада за штапски меѓупартиски пресметки“.
„Северна Македонија е во предизборна кампања, иако официјално таа не е започната. Партиите веќе интензивно ги запалија пропагандистичките мотори, во кои како инструмент за убедување дека противникот е во погрешна политичка линија, односно не е на страната на народот, се искористуваат или злоупотребуваат дезинформациите.“, пишува Сефер Тахири во анализата „ Предизборна трка со дезинформации“.
Подготви: Д. Тахири