ВЕСТ НА ДЕНОТ
Дводневен Самит на ЕУ во Будимпешта
Случувањата во Украина и на Блискиот Исток ќе бидат главни теми на денешниот петти Самит на Европската политичка заедница во Будимпешта, на кој ќе учествува и премиерот Христијан Мицкоски.
На собирот, чиј домаќин е унгарскиот премиер Виктор Орбан, е најавено учество на 47 шефови на држави или влади од Европа, како и на делегација на ЕУ, што ќе ја сочинуваат претседателот на Европскиот совет, Шарл Мишел, претседателката на Европската комисија, Урсула фон дер Лајен и високиот претставник за надворешна политика и безбедност Жозеп Борел.
ИЗЈАВА НА ДЕНОТ
Марта Кос: Очекуваме Северна Македонија да го промени Уставот како што вети, ништо повеќе и ништо помалку
„Исполнувањето на обврските е многу важно. Кога зборувам за билатерилизација на можни спорови меѓу земји членки и земји кандидатки, интересот на земјите членки секако дека доаѓа прв. Она што јас го гледам, а тоа ќе биде моја работа ако бидам потврдена за еврокомесарка, јас и моите колеги ќе направиме се што можеме за да не увезуваме билатерални прашања во процесот на проширување. Но, имаме ситуација како во вашата земја кога сево ова е дел… Штом го имаме процесот на преговори имаме на располагање повеќе алатки како да им помогнеме на земјите кандидатки, но и на земјите членки да постигнат решение. Нема друг начин. Не можам да поставам датум колку долго ќе трае тој развој, но недоразбирањата треба да ги надминеме врз основа на нашите вредности“, истакна кандидатката за комесар за проширување на ЕУ Марта Кос.
РЕГИОН
Македонскиот јазик во наставната програма на Факултетот за странски јазици во Тирана
Предметот македонски јазик влегува во редовната наставна програма на постдипломските студии на Факултетот за странски јазици во Тирана. Целта на наставната програма на овие постдипломски студии е создавање на висококвалификувани кадри кои со својот космополитски и полиглотски поглед на светот, ќе ги разбиваат јазичните бариери и ќе создаваат нови мостови меѓу културите преку туризмот.
СВЕТ
Бајден брза да испрати помош за Украина пред инаугурацијата на Трамп
Белата куќа планира да испорача воена помош од милијарди долари за Украина за време на претседателот Џозеф Бајден, кој ја напушта функцијата во јануари. Како што пренесува МИА, според неименувани официјални лица,„ испраќањето помош за Украина се брза за зајакнување на владата во Киjiв пред инаугурацијата на новоизбраниот претседател Доналд Трамп на 20 јануари“.
ПРАШАЊЕ НА ДЕНОТ: Што мислите за иницијативата да се укине „недела неработен ден“?
ВОНРЕДЕН КОЛЕГИУМ со Џабир Дерала директно од Вилнус, Литванија
СЛБОДНА ЗОНА
„До каде ќе одат со колективната делузија и комплетното губење на контакт со реалноста, истовремено „спрдајќи“ се со интелигенцијата на голем дел од граѓаните на земјава, ставајќи ги во ист кош со нивните „заслепени“ приврзаници со меморија на златна рипка, лесни за манипулација. Антонијо Милошоски, долгогодишен висок функционер, пратеник, министер (што ќе рече цел живот закачен на буџетот на државната …) од редовите на ВМРО-ДПМНЕ, мртов ладен измисли топла вода, и по повеќедецениска тесна и плодна соработка на Македонија и САД, сега изјавува дека токму неговата партија почнала да гради силна релација со САД, партнерство од важен национален интерес“, пишува Драган Мишев во „Антонијо Милошоски со меморија на златна рипка допрва ќе гради силна релација и партнерството со САД“.
Подготви: Б. Ј.
