24 ЧАСА: Извештајот на ЕП усвоен без македонски идентитет и јазик, Мицкоски вели – остануваме горди; Еден повреден, нападнати новинари, приведен газдата на опожарениот отпад во Визбегово, Русија со масовен напад врз Украина по критиките на Трамп кон Путин

ВЕСТ НА ДЕНОТ

Без македонски идентитет и јазик, ЕП го усвои Извештајот на Вајц за Северна Македонија

Европскиот парламент денеска со 461 глас „за“, 121 „против“ и 107 „воздржани“ го усвои Извештајот на австрискиот европратеник Томас Вајц за нашата држава за 2023 и 2024 година.

Извештајот ги опфаќа клучните реформи и предизвици на земјава на патот кон Европската Унија, но вниманието на јавноста го привлече фактот што во неговата конечна форма се отстранети сите конкретни референци на „македонскиот јазик и идентитет“, кои претходно беа присутни во нацрт-верзијата.

„Остануваме горди, со крената глава. Денес Бугарија работеше против нас. Денес светот виде со какви предизвици и неправди се соочуваме како држава и народ во 21 век. Денес комотно и на очиглед на сите, на Европа можеме да и кажеме дека вистината излезе на виделина“, рече денеска премиерот Христијан Мицкоски на вонредна прес-конференција.

Како што порача Мицкоски од партискиот штаб, ние сме на вистинската страна од историјата, „а Бугарија видовме дека знае и да ја утне вистинската страна“.

Пред гласањето по документот, беа усвоени амандманите предложени од европратениците Анджеј Халицки во име на Европската народна партија (ЕПП), Кетлин Ван Бремпт во име на Прогресивната алијанса на социјалистите и демократиите (СД) и Дан Барна во име на либералната група „Да ја обновиме Европа“ (РЕ), со кои се избришани делови од текстот во Извештајот каде се споменуваа „македонскиот јазик и идентитет“.

ИЗЈАВА НА ДЕНОТ

Еден повреден, нападната екипата на Алсат М, приведен сопственикот на отпадот во Визбегово, пожарот се гасне од земја и од воздух

Денеска (09.07.2025) во 09.16 ч. во СВР Скопје е пријавено дека на отпад за старо железо ул. „Б. Буна“ во Скопје има пожар односно дека горат хаварисани возила, на кои имало монтирано плински уреди и се слушаат детонации од истите. До сега нема зафатено приватен имот – куќи. Се преземаат мерки за гасење на огнот и расчистување на случајот. До овој момент едно лице е повредено и е пренесено за укажување лекарска помош. Поради непочитување наредба од службено лице, приведен е А.Н., сопственик на правното лице што управува со отпадот, информира МВР.

РЕГИОН

Пет косовски полицајци денеска пред приштинскиот суд под сомнение за вмешаност во смртта на 27 годишен маж во Липљан

Во ноќта на 7 јули се случи сериозен инцидент во градот Липљан, Косово, каде што 27-годишниот Агон Зејнулаху го загуби животот по полициска интервенција, јавуваат косовските медиуми. Случајот сега е класифициран како сомнителна смрт, додека пет полицајци се уапсени и суспендирани од должност под сомнение за „убиство од небрежност“.

СВЕТ

Русија започна голем воздушен напад врз Украина по критиките на Трамп кон Путин

Украинскиот претседател Володимир Зеленски утрово изјави дека Русија се обидела да нападне 741 цел со 728 дронови и 13 ракети, пренесе Гардијан.

ФОРУМ

ПРАШАЊЕ НА ДЕНОТ: Чија е одговорноста за губењето на статусот на Охрид во УНЕСКО?

СЛОБОДНА ЗОНА

Доколку од удобноста на службеното возило, помеѓу многубројните прошетките во странство, премиерот ако се реши да прошета по скопските улици, и доколку погледне без розовите наочари, ќе види 1 слика која кажува 1000 зборови.

Добро утро од четвртата економија во Европа, пишува Драган Мишев.

Д. Муратов