ВЕСТ НА ДЕНОТ
Неодамна, во Редакција ЦИВИЛ МЕДИА пристигна допис од група вработени во Агенцијата за разузнавање (АР) со кој се обраќаат до јавноста, изразувајќи надеж дека сè уште постојат професионални медиуми кои ќе ја пренесат нивната порака, со цел да ја информираат јавноста за сериозните проблеми во Агенцијата во време кога, како што велат, „веќе де факто немаме власт“.
Заради сериозноста на наводите во соопштението, редакцијата на Цивил Медиа прво истражи дали навистина постои таква „група вработени во АР“, стапувајќи во контакт со доверлив извор во Агенцијата кој побара да остане анонимен. Изворот ја потврди автентичноста на соопштението и дека зад групата вработени кои се потписници на соопштението стојат автентични личности вработени во АР.
Членовите на групата, за себе велат дека се патриоти кои си ја сакаат државата и се секогаш чекор понапред од злонамерните и корумпирани политичари, како и криминални структури кои работат заедно со одредени политички структури. Такви биле случаите кога информирале дека Горан Николовски викан „Џони“ ќе биде избран за Советник за Национална Безбедност на Премиерот, што и се случи.
Групата вработени во Агенцијата за разузнавање посочуваат и на даденото ветување дека Душко Марковски во ниту една можна комбинација нема да биде дел од безбедносните структури, што е исто така исполнето, како и за незаконското поставување на Игор Андоновски за началник на АНБ за Град Скопје, откако информирале за тоа, додека лицето Љубчо Андоновски глумело експерт, само за синот да добие унапредување – што и се случи, а сега го спремаат и за нов Директор на новата служба за неколку години. Фамилијарно, како во време на комунизмот, посочуваат тие во дописот.
Во писмото, групата наведува неколку шокантни и алармантни факти за безбедноста на земјата, а како пример ги посочуваат „празните зборови на Премиерот“ за кого велат дека работи „по наредба на неговиот шеф Вучиќ“. Понатаму, тие посочуваат дека „многу НАТО членки ги споиле своите служби е само гола реторика, за да го оправда градењето на својата диктатура“.
ИЗЈАВА НА ДЕНОТ
„Го извртевме значењето на минималната плата, во светот таа не гарантира дека може да се издржува 4-члено семејство. Јас сум работел за минимална плата во САД, во Бостон, во супермаркет додека студирав. Се знае каков стандард можете да обезбедите со тоа, и тие што земаат минимална плата работат по 2-3 работи. Би порачал во одреден период во животот, тоа не е срамота, како дополнителна работа може да работи за минимална плата, но трудете се никогаш повеќе, според своите квалификации, да не се најдете во ситуација да барате минимална плата“, вели Славески.
РЕГИОН
Српскиот претседател Александар Вучиќ на 11 јуни изјави дека не ја потпишал заедничката декларација од самитот Украина-Југоисточна Европа во Одеса да не ја „предаде Русија“, пренесува Кијив Индипендент.
Декларацијата, потпишана од сите други учесници, меѓу кои и македонскиот претставник, вицепрмиерот Изет Меџити, ја осудува нелегалната агресија на Русија, повикува на целосно повлекување на руските сили од Украина и ја потврдува поддршката за територијалниот интегритет на Украина.
СВЕТ
Иран предупреди дека ќе ги засили своите нуклеарни активности откако одборот на гувернери од 35 члена на нуклеарното надзорно тело на Обединетите нации усвои резолуција во четвртокот со која се прогласува дека ги прекршил своите обврски за неширење, објави Си-ен-ен.
*
Повеќе од сто безживотни тела се донесени во болницата во Ахмедабад по уривањето на патничкиот авион на „Ер Индија“, кој летал за Лондон. Авионот Боинг 787-8, со 232 патници и 12 членови на екипажот, што денеска се урна кратко време по полетувањето од индискиот град Ахмедабад, падна врз студентски дом на Медицинскиот колеџ, во кој се сместени студенти и млади лекари.
ФОРУМ
ПРАШАЊЕ НА ДЕНОТ: Дали треба да се врати задолжителен воен рок во Македонија?
Данскиот парламент гласаше синоќа без ниту еден глас против за задолжителната воена служба за жените.
По наполнување 18 години, данските жени ќе служат воена служба, како и младите мажи, 11 месеци, а обуката би можела да започне веќе следниот месец. Досега, жените можеа да учествуваат во воена обука 4 месеци, и тоа доброволно.
СЛОБОДНА ЗОНА
„Зборовите на Рубио, прекриени со јазикот на мирот и „конструктивниот ангажман“, не се само глувотија – тие се предавство. Предавство на Украина. Предавство на американските вредности. Предавство на самата вистина.
„Траен мир“, се вели во соопштението. Но, нема мир без правда. А правдата не може да коегзистира со додворување или со ова скандалозно застанување на истата линија со воен злосторник, на сметка на вистинските сојузници“, пишува Џабир Дерала во колумната „Од морален компас до морален колапс: Срамната честитка на Вашингтон за „Денот на Русија“
*
„Намерата во одговорот на реакциите на Филип Петровски и уредничкиот тим на Инфомакс не беше искрено извинување. Тоа беше операција за управување со перцепцијата – обид да се контролира оптиката, а не да се признае вина. На целата изведба следеше предвидлив редослед: негирање на намерата, префрлање на вината, фалба за „достоинствената“ реакција на навредените, сомнеж за нивните мотиви, и конечно – прогласување дека случајот е затворен. Ова не е нова формула. Тоа е добро познат модел на контролирање штета, каде што целта не е вистина или правда, туку затворање на наративот – по можност под услови диктирани од оние кои ја предизвикале штетата“, пишува Менсур Халити во колумната „Ова беше извинување – во колоквијална смислa, во реалноста, тоа беше прикривање“.
