ВЕСТ НА ДЕНОТ
Собранието го донесе Ребалансот на буџетот, опозицијата смета дека е скроен како предизборен поткуп за изборите
Собранието со 65 гласа „за“ и 14 гласа „против“ го донесе Дополнетиот ребаланс на Буџетот за 2025 година.
Во текот на расправата, власта и опозицијата со спротиставени мислења за овој стратешки економски документ.
Ставот на владејачкото мнозинство е дека Дополнетиот ребаланс на Буџетот ќе обезбеди економски раст и дека се работи за буџет во кој има повеќе средства за пензионерите, за младите и за реализација на големи капитални проекти во општините. Истакнаа дека се реализирани сите крупни ветувања и посочија дека се зголемени пензиите, платите во образованието, здравството, полицијата и администрацијата, дека има најдобар реализиран откуп на земјоделски производи и завршени инфраструктурни проекти.
Опозицијата со забелешка за неприсуството на министерката за финансии во попладневниот дел од расправата што според нив укажува на несериозноста на Владата кон овој стратешки документ. За опозицијата, Дополнетиот ребаланс на Буџетот е буџет кој се фокусира на краткорочни мерки, во кој не се испочитувани основните фискални правила и кој е скроен за поткуп на изборите во октомври.
Според Фатмир Битиќи од СДСМ, ребалансот не е развоен и не е социјално одговорен, туку е буџет за селективна поддршка со краткорочни политички пресметки, скроен како предизборен поткуп за изборите во октомври.
ИЗЈАВА НА ДЕНОТ
Фон дер Лајен: Светот се промени засекогаш — време е да се соочиме со реалноста
„Почетната точка тука е да се соочиме со светот каков што навистина е – а не каков што можеби го паметиме од минатите генерации. Јас сум на став дека периодот во кој се наоѓаме сега – и начинот на кој се справуваме со него – ќе го дефинира остатокот од овој век.“, изјави претседателката на Европската комисија, Урсула фон дер Лајен, на Универзитетот Кејо во Токио, каде што ѝ беше доделена почесна докторска титула.
РЕГИОН
Република Српска сега ангажира човек на Трамп за лобирање со нов договор вреден 10.000 долари месечно
Според новиот договор за консултации меѓу двете американски компании, кој беше склучен на 1 јули 2025 година, „MO Strategies, Inc.“ ќе помага во претставувањето на Владата на САД за прашања идентификувани од властите на Република Српска.
СВЕТ
Низ Газа се шири масовен глад, предупредуваат хуманитарните агенции
Над 100 хуманитарни организации предупредија денеска дека „масовен глад“ се шири во Газа.
ОН соопштија дека израелските сили убиле повеќе од 1.000 Палестинци кои се обидувале да добијат помош во храна откако Хуманитарната фондација за Газа, поддржана од САД и Израел, започна со работа кон крајот на мај – со што всушност го маргинализираше постојниот систем предводен од ОН.
Во соопштението со 111 потписници, вклучувајќи ги Лекари без граници (MSF), Спасете ги децата и Оксфам, се предупредува дека „нашите колеги и оние на кои им служиме се исцрпуваат“, пишува Гардијан.
Групите повикаа на итно договорено прекин на огнот, отворање на сите копнени премини и слободен проток на помош преку механизмите предводени од ОН.
ПРАШАЊЕ НА ДЕНОТ
На кој начин катастрофалниот јавен превоз ви го упропастува денот?
АЛ-ПРЕС
Редакциски избор од албански медиуми во регионот: Тирана се приклучува на глобалниот бран протести за Газа, Тунберг една од организаторите; Уште три дена рок од уставниот суд за конституирање на Косовското собрание; Кули во центарот на Тирана со цени на квадратен метар како во Милано
Подготви: Д. Тахири
