Република Северна Македонија вчера го доби шестиот претседател и воедно прва претседателка од осамостојувањето, Гордана Силјановска Давкова. Петгодишниот мандат го почна со свечена заклетва и обраќање во Собранието откако ден претходно од Државната изборна комисија го доби уверението за Претседател по објавените конечни резултати од Претседателските избори 2024.
Во свечената изјава Сиљановска-Давкова не го употреби уставното име на државата – Северна Македонија, туку рече Македонија, што предизвика бројни реакции од меѓународната заедница, а грчката амбасадорка Софија Филипиду, која заедно со колегите амбасадори дојде да ја проследи седницата на Собранието за инаугурација на Гордана Силјановска-Давкова, ја напушти пленарната сала во знак на протест.
РЕАКЦИИ
САД: Откако ќе се формира нова влада и ќе се избере премиер, ќе продолжиме да ја зајакнуваме важноста на почитувањето на меѓународните договори и придобивките од напредокот на државата со полноправно членство во Европската Унија“
Лога – МП: Непочитувањето на уставното име на државата ја прави ништовна заклетвата на Силјановска
ВЛЕН: Претседателот на Републиката мора да биде пример за почитување на Уставот, особено кога станува збор за професорка по уставно право
Од Кабинетот на Претседателот пристигна став во врска со употребата на името Македонија од страна на претседателката Гордана Силјановска Давкова.
„Претседателката Гордана Силјановска Давкова ќе се придржува до официјалната примена на уставното име. Согласно Уставот, како што беше подготвена од службите на Собранието, свечената заклетва беше потпишана со користење на уставното име.“, се наведува меѓу другото во соопштението.
ИЗЈАВА НА ДЕНОТ
„Провокативниот избор на новата претседателка на Северна Македонија да го прекрши официјалниот текст на заклетвата и да ја нарече земјата со различно име претставува нелегална и недозволива иницијатива.“, изјави грчкиот премиер Кирјакос Мицотакис.
ФЛЕШ ВЕСТИ
СЛОБОДА НА МЕДИУМИ Меѓународни групи за слобода на медиумите ги повикаа Тошковски и Мицкоски да престанат со малтретирањето на новинарот Фуркан Салиу.
ПРАВДА До Основното јавно обвинителство за гонење на организиран криминал и корупција поднесена е кривична пријава против три лица од Тетово осомничени дека го оштетиле ФЗО за над 600 илјади евра.
ОБРАЗОВАНИЕ Центарот за рангирање на светски универзитети (CWUR) ја објави листата на 2.000 најдобри универзитети во светот за 2024 година, на која државниот Универзитет „Св. Кирил и Методиј“ – Скопје е рангиран на 1.990 место.
ВОЈНА ВО УКРАИНА
Продолжуваат жестоките одбранбени битки на голем дел од пограничната област на регионот Харкив, објави украинскиот претседателот Володимир Зеленски во синоќешното видео обраќање до нацијата.
КОНФЛИКТИ
ГАЗА – Околу 360.000 луѓе го напуштиле најјужниот град во Газа, Рафах, во изминатата недела, според главната агенција на ОН за помош во Газа, пренесува Си-Ен-Ен.
ГОВОР НА ОМРАЗА
Изоставувањето на „Северна“ на Силјановска Давкова предизвика реакции и говор на омраза
Експлицитен говор на омраза и повици за апсење на поранешниот министер за надворешни работи, Денко Малески, поради неговата реакција дека претседателката Гордана Силјановска-Давкова практично ѝ објави војна на Грција со тоа што при инагурацијата одби да го употреби новото уставно име на државата.
СЛОБОДНА ЗОНА
Само што отсега натаму, прпелкањето во сопствената ментална атрофија, ќе ни се случува онака – Гордо, По допрен глас, од Зоран Иванов.
Другиот образ, Злото и шифоњерот, од Борко Зафировски.
Опасен скандал на инаугурацијата на новата претседателка, Брза пошта од Љубомир Костовски.
Инаугуративното обраќање на Претседателката: Бла, бла, Македонија, бла, бла, Мицкоски, Мицкоски, Мицкоски, бла, бла, жени…и толку, од Драган Мишев.
Подготви: Д. Тахири
