24 ЧАСА: Мерко е повторно невин; Руте бара 400% зголемување на НАТО капацитетот за воздушна одбрана; Коалицијата на Вучиќ победи на локалните избори во Заечар и Косјериќ

ВЕСТ НА ДЕНОТ

Мерко куртули за „аудито“

Струшкиот суд донесе ослободителна пресуда за градоначалникот Рамис Мерко за набавката на луксузниот автомобил „Ауди“ во вредност од 67.000 евра. Судечкиот судија Јордан Јованов во пресудата посочува дека од правен аспект со анализа на сите законски прописи кај Мерко не постои основ за кривична одговорност и затоа судот донел одлука за ослободителна пресуда.

„При донесувањето на пресудата се раководев од фактот што во диспозитивот на обвинителниот предлог не е содржана бланкетна норма и оти со тоа постапување спротивно на наведената бланкетна норма на некого му е прибавена корист или на некого му е прибавена штета“, појасни Јованов при образложението на пресудата.

ИЗЈАВА НА ДЕНОТ

Руте: Зголемување на воздухопловната одбрана на НАТО за 400 отсто во одбрана од Русија која „сее терор“ на небото

„Ќе барам зголемување на воздухопловната и антиракетна одбрана на Алијансата за 400 проценти со цел да се соочи со Русија која „сее терор“ на небото… Треба да направиме скок напред во нашата колективна одбрана… факт е дека опасноста не исчезнува дури ни со крајот на војната во Украина. Гледаме како Русија во Украина сее терор на небото и поради тоа ние ќе го зајакнеме штитот кој го штити нашиот воздушен простор“, изјави Марк Руте, Генералниот секретар на НАТО во Лондон.

РЕГИОН

Листата „Не ја даваме Србија-Александар Вучиќ“ доби највеќе гласови на локални избори во два града во Србија

Во Србија вчера во градовите Заечар и Косјериќ се одржаа избори за советници во собранијата на локалната самоуправа каде граѓаните избираа помеѓу осум листи во Заечар и три во Косјериќ. По изборниот ден, на кој имаше голема излезност на гласачите, во ноќните часови  победа прогласија и опозицијата,и партијата на Вучиќ.

СВЕТ

Полицијата им нареди на демонстрантите да го напуштат центарот на Лос Анџелес, додека Трамп вели „доведете ги војниците“

Протестите против рациите за имиграција во Лос Анџелес продолжуваат трет ден по ред, а полицијата вели дека центарот на Лос Анџелес сега е „незаконско собирање“. Има извештаи за запалени возила и за грабежи, додека еден британски фотограф има потреба од операција откако бил застрелан со гумен куршум.

АЛ-ПРЕС

Редакциски избор од албански медиуми: Забраната на ТикТок во Албанија и медиумите; Продолжува судењето за Бањска; Во Приштина започна „Неделата на гордоста“

ПРАШАЊЕ НА ДЕНОТ: Што мислите за телефонската линија што ја отвори владата за Кочани?

СЛОБОДНА ЗОНА

„Нема сомнение дека она што е сега МЖ, а претходно во рамките на ЈЖ, беше во градежна експанзија и требаше да биде првата која ќе ја поврзе Албанија со светот. Отпори имаше и во тогашната федерација и во Албанија на Енвер Хоџа. Денес во светот на сообраќајот работите брзо се сменија и Коридорот 8 наеднаш добива апсолутен примат заради свртувањето на превозот на стоки токму на шините што ќе водат од Киан до Турција, а од таму и до Македонија – ако некој гледа подалеку од носот“, пишува Љубомир Костовски во првиот дел од анализата „КОРИДОРИТЕ И ОЧАЈНАТА СОСТОЈБА НА СИСТЕМОТ (II): Пругата за Ќафасан поставена на многу баксузи, а исправена пред светски предизвик“.

Подготви: Б Јордановска