ВЕСТ НА ДЕНОТ
Министерот Фетаи добил смртна закана – „куршум во глава шипо Фетаи“
Вицепремиерот за добро владеење и транспарентност Арбен Фетаи, на службениот мејл, добил порака со закана по животот. Информацијата ја објави тој на својот Фејсбук профил посочувајќи дека пораката стигнала по неговата изјава за отстранување на дефиницијата „20 проценти“ за албанскиот јазик во Уставот.
„Денес, од европската престолнина Брисел, се чувствувам принуден да одговорам на заканата по мојот живот што ја добив во мојата официјална електронска пошта. Оваа закана дојде по мојата вчерашна изјава за отстранување на дефиницијата ’20 проценти’ за албанскиот јазик. Мејлот е насловен ‘куршум во глава за тебе шипо Фетаи’ и ја содржи оваа порака: ‘Нема да се сменат 20-те проценти, туку се шиптарско ќе ве убиеме со куршуми во глава. Да цркнете, мртов шиптар, добар шиптар, смрт за шиптари’“, напиша Фетаи на Фејсбук.
ИЗЈАВА НА ДЕНОТ
„Неуспехот да стапиме во контакт и на самиот почеток да воспоставиме одржливо партнерство само ни покажа дека градот не е суштински посветен на младите и кандидирањето за оваа титула не е мотивирано од вистинските потреба за поставување на младите високо на листата на приоритети. Овој заклучок дополнително ни се потврдува со фактот дека градот не покажа доволно посветеност за надминување на препреките за формирање на локален младински совет, усвојување на локална стратегија за млади, ниту пак отварање на младински центар, дел од механизмите кои се основа и на самата кандидатура за Европска младинска престолнина 2027“, пишува во соопшението.
РЕГИОН
Борел: ЕУ ги отфрла обидите за давање легитимитет на т.н. Турска Република Северен Кипар
Европската унија ги отфрла постојаните обиди на Организацијата на туркофонските држави за давање легитимитет на „сецесионистичкиот ентитет на кипарските Турци“, т.н. меѓународно непризната Турска Република Северен Кипар, за време на нејзиниот последен Самит што се одржа во Бишкек, порача високиот претставник за надворешна политика и безбедност Жосеп Борел.
СВЕТ
ЕУ ја продолжува мисијата за воена помош за Украина за уште две години
Советот на ЕУ објави дека го продолжува мандатот на Мисијата за воена помош во Украина за две години, до 15 ноември 2026 година, со доделен буџет од речиси 409 милиони евра. Мисијата се спроведува во земјите на ЕУ и е наменета за обука на украински војници.
ГРАЃАНСКА АКЦИЈА
ПРАШАЊЕ НА ДЕНОТ: Што мислите за предлогот – укинување на ДДВ на храната?
СЛОБОДНА ЗОНА
ФОТО НА ДЕНОТ: Графитот „БУГАРИ ВО УСТАВ“- пред и потоа
Од неодамна, графитот „ БУГАРИ ВО УСТАВ Е ПРЕДАВСТВО“ кој пред изборите можеше да се види на кејот на Вардар, по изборите, со промената на власта, откако ВМРО-ДПМНЕ од опозициска стана владејачка партија, доживеа козметичка интервенција со што преку скратената содржина веќе испраќа и нова порака.
Со молерско- фарбарската мајсторија на непознати улични уметници, Бугари во устав веќе не е предавство.
*
„Премиерот Христијан Мицкоски на Фејсбук објави дека на маргините на Европската политичка заедница во Будимпешта се сретнал со францускиот претседател Емануел Макрон за што како corpus delicti објави и фото под кое напиша дека со него остварил продуктивна средба и дека отворено разговарале за одблокирање на патот на Македонија кон ЕУ и во истиот тој еден пишан здив нам, на читачите на неговиот пост и на македонската јавност, онака ЕПП немушто ни појаснува дека е оптимист за нашата иднина и дека се борел, тој напиша се бориме за нашите аргументи и за вистината која е незаобиколива и дака ќе дале, тој напиша дадеме, сè од себе да ги зачуваме државните и националните интереси и толку, од празно, по празно и, вообичаено, пак недоречен и со обратен ефект осамна овој денешен пропаганден пост на премиерот во делот за тоа дали и што тоа, ако воопшто се впуштил во дијалог, му реплицирал Макрон па, кажано во една реченица, останува сомнежот дека средбата била монолог и дека Французинот само љубезно протоколарно позирал и дека му одговорил – ништо, пишува Зоран Иванов.
*
„Претседателскиот реизбор на Доналд Трамп не само што ја тресе американската политика – туку испраќа шок низ целиот свет, зголемувајќи ги заканите за демократските темели на Европа.
Никаде не се чувствува ова чувство на притисок повеќе отколку кај Ромите, како најголемо и најдискриминирано малцинство во Европа, чијашто кревка заштита виси на конец. Со САД кои се повлекуваат од својата историска улога како глобален заштитник на демократијата, Европа се соочува со клучен избор: да ја брани инклузивноста или да ризикува да поттикне стратешката ранливост која што би им овозможила на екстремистите од десницата и авторитаризмот да ги раскинат нејзините основни вредности“, пишува Менсур Халити во колумната „Претседателскиот реизбор на Трамп и иднината на ромската политика: Тест за демократскиот интегритет на Европа“.
Д. Муратов
