ВЕСТ НА ДЕНОТ
Мицкоски размислува да ја реши демографската криза со воведување даноци за немажени и неженети лица
Говорејќи на настанот „Демографски трендови, предизвици и можни решенија – Развој на стратешки документи за демографска отпорност“, премиерот Христијан Мицкоски истакна дека демографската криза е еден од најголемите предизвици за Македонија и Европа. За надминување на овој проблем, како една од можните мерки тој рече дека се разгледува воведување дополнителни даноци за немажени и неженети лица.
Премиерот презентираше податоци според кои во 2024 година се родиле 16.061 деца, а починале 20.201 лице, што значи природниот прираст на населението е во негатива од 4.140 луѓе за само една година.
Тој предупреди дека трендовите на намален наталитет, зголемување на бројот на стари лица и масовно иселување водат кон сериозна демографска рецесија.
„Време е мајчинството да биде благослов, а не товар. Време е да изградиме институции кои ќе ја негуваат младоста и ќе ја враќаат надежта“, додаде премиерот, нагласувајќи дека борбата со демографската криза бара ангажман од целото општество, а не само од едно министерство.
Идејата за воведување данок за лица кои не се во брак е разгледувана и за време на претходни влади предводени од ВМРО-ДПМНЕ кога на нејзино чело беше бегалецот од правдата Никола Груевски, но никогаш не била формализирана како конкретен законски предлог.
ИЗЈАВА НА ДЕНОТ
Коцевски: Завршени вештачењата за пожарот во дискотеката Пулс во Кочани и за Онкологија
-Сите оние вештачења кои се однесуваат за Кочани и кои се однесуваат за Онкологија веќе се изработени. Колку што имам информации за предметот Онкологија веќе е закажана главна расправа. Меѓутоа тие вештачења имаат одредени трошоци коишто се да речам вонредени трошоци имајќи во предвид дека се многу скапи со оглед дека се работи за вештачење во друга држава, рече Коцевски.
РЕГИОН
Петти ден блокади на протестите низ Србија, полицијата на улиците
Студентите во блокадата повикаа на „тотална блокада на Србија поради полициска бруталност“ еден ден претходно. Повикот следеше по полициските акции за време на кои речиси 80 студенти и антивладини демонстранти беа уапсени во неколку градови во ноќта помеѓу 2 и 3 јули.
СВЕТ
Конгресот го усвои „големиот, прекрасен закон“ на Трамп за намалување на даноците и трошоците
Конгресот на САД го усвои обемниот закон за даноци и трошоци на Доналд Трамп, што претставува значајна и тешка победа за претседателот и неговата домашна агенда, пренесува Би-би-си. По исцрпувачка седница на Капитол Хил, Претставничкиот дом го усвои законот со 218 гласови „за“ и 214 „против“ во четврток попладне. Тој беше одобрен во Сенатот во вторникот со само еден глас повеќе.
ФОРУМ
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
СЛОБОДНА ЗОНА
„Мицкоски ќе ги тера младите да се мажат и женат, и оро да играат. Ќе воведувал данок за ергените. Браво, оТличен пројек!!1 И не само данок, затворска казна треба да им воведе на сите полнолетни млади дечки и девојки што ќе избегнуваат задолжителен „брачен рок“!, пишува Дехран Муратов во колумната „Доста време ерген одев“!
*
„Одлична претстава, бравос, свака част мајсторе…ова секако доколку седите во некое кабаре и гледате како магионичарот става гулаби во шеширот, џирибу/џириба едно пуцкање со прстите и оп – гулабите ги снемува.
Така големиот магионичар Мицкоски, во манирот на најголемите илузионисти, направи да ги снема одеднаш македонскиот јазик и идентитет. Служејќи се со старите добри магионичарски трикови на свртување на вниманието на гледачот од вистинската акција, додека ја замајуваше публиката со приказни за новото модерно, пинџурот и други бла-бла-бла дребулии за да се „забавља“ народ, истовремено си буричкаше во шеширот и на публиката ѝ го извади извештајот од кој магично исчезнаа македонскиот јазик и идентитетот“, пишува Драган Мишев во колумната „Спектакуларен успех на големиот магионичар Мицко – направи да ги снема македонскиот јазик и идентитет“.
Д. Муратов
