ВЕСТ НА ДЕНОТ
Владата не потпиша договори за парите од унгарскиот кредит само со општините Струмица, Сарај, Теарце и Град Скопје
Градоначалниците на општините ги потпишаа проектните договори кои ги добија од јавниот повик на Владата за поддршка на локалната власт. Од вкупната вредност од 100 милиони евра од првата фаза, општините заработија околу 67 милиони евра за 274 проекти. Четирите општини, Град Скопје, Струмица, Сарај и Теарце на кои не им беше прифатен ниту еден проект останува да аплицираат повторно до 15 ноември, истакна премиерот Христијан Мицкоски.
ИЗЈАВА НА ДЕНОТ
Ахмети со писмо до Мицкоски: Измените на Законот за употреба на јазиците не само што се политички контроверзни, туку се опасни и штетни за напредокот и одржливоста на општеството
„Последните одлуки на Уставниот суд, кои изгледа дека се извршување на програмата на вашата партија за укинување на клучните механизми за заштита на заедниците, предизвикаа загриженост кај сите граѓани кои се посветени на градењето на подобро одржливи меѓуетнички односи во Северна Македонија. Охридскиот договор, кој донесе подобро меѓуетничко разбирање, не е само политичко прашање, туку е темел на нашата мултиетничка демократија, стабилност и демократски напредок. Секоја обид за негово доведување во прашање, особено во актуелниот контекст, е чекор кој може да ја влоши состојбата во земјата и регионот“, стои во писмото на Али Ахмети, лидерот на ДУИ до премиерот Христијан Мицкоски.
РЕГИОН
На истокот ништо ново: ГЕРБ на Борисов победи на предвремените избори во Бугарија, неизвесно формирањето на владина коалиција
Десничарската партија ГЕРБ на поранешниот премиер Бојко Борисов е победник на вчерашните парламентарни избори во Бугарија, седми во последните две години, покажуваат првичните прелиминарни резултати од гласањето. Вкупно 327 бугарски државјани во Северна Македонија гласаа на вчерашните предвремени избори.
СВЕТ
Харис објавува план како ќе им се помогне на Порториканците во Америка, на митингот на Трамп, Порто Рико се нарекува „пловечки остров од ѓубре“
Додека Харис објавува план како ќе им се помогне на Порториканците во Америка, на митингот на Трамп, во Медисон Сквер Гарден, Порто Рико се нарекува „пловечки остров од ѓубре“, меѓу другите расистички и навредливи изјави.
ДЕЗИНФОРМАЦИИ
Со фотомонтажа се шири лажна вест дека е уапсена претседателката на ЕК, Урсула Фон дер Лајен
Дезинформација е дека претседателката на Европската комисија, Урсула Фон дер Лајен беше уапсена во Европскиот парламент како што се споделува на социјалните мрежи. Профилот на Х мрежата што ја шири оваа лажна вест според објавите е поддржувач на претседателскиот кандидат на САД, Доналд Трамп.
ПРАШАЊЕ НА ДЕНОТ: Што мислите за процедурата на доделување пари за проекти на општините?
СЛОБОДНА ЗОНА
„И покрај западните санкции кои имаа цел да ја намалат руската способност за водење војна, финансиската стратегија на Путин, водена од логиката на војната, се покажува изненадувачки отпорна – иако е изложена на висок ризик од колапс. Во оваа анализа се истражуваат механизмите на економската издржливост на Путинова Русија и последиците од пропустите и нерешителноста на Западот“, пишува Џабир Дерала во анализата „Руската воена економија и западната небрежност: Мирот и слободата меѓу профитот и крвавата војна“.
Подготви: Б. Јордановска
