ВЕСТ НА ДЕНОТ
Уште една жртва од пожарот во Кочани
Почина уште еден пациент од пожарот во Кочани кој се лекуваше во Литванија. Тој е 61-та жртва од трагедијата во Кочани. Минатата недела почина и управителот на дискотеката Александар Карадаковски.
Во пожарот во Кочани беа повредени околу 200 лица од кои дел беа пратени на лекување во странство.
ИЗЈАВА НА ДЕНОТ
Мицкоски за царините од САД: Oчигледно е грешка или погрешна информација, oчекувам многу скоро да се коригира одлуката
„Работиме со нашите партнери, САД, очекувам многу скоро да се коригира ова што очигледно е резултат на некаква грешка или погрешна информација, имајќи предвид дека лани нашата трговската размена со САД беше во негатива, односно сме во дефицит, а тие држави што се во дефицит немаат ваков тип зголемување на давачките.
Сега се споредуваат податоците, во контакт сме со Амбасадата, со Министерството за економија и со Кабинетот на Трамп, а тоа беше дел од разговорите и на Муцунски и државниот секретар во Брисел, така што во периодот очекувам да се излезе од оваа состојба“, изјави премиерот Христијан Мицкоски.
РЕГИОН
Над 150 Срби од Косово тргнаа пеш на собирот на Вучиќ, што ќе се одржи 12 април во Белград
Повеќе од 150 Срби од Косово вчера тргнаа пеш кон Белград, за да присуствуваат на собирот во сабота на 12 април, по повод формирањето на Движењето за народот и државата, што претседателот на Србија, Александар Вучиќ, го најавува за следниот викенд
СВЕТ
„Не ми се допаѓа бомбардирањето“, одговори Трамп на новинарите, повикувајќи го Путин да престане со насилството
Американскиот претседател Доналд Трамп го повтори својот повик за прекин на огнот во руско-украинската војна на 6 април, повикувајќи го рускиот претседател Владимир Путин да престане со насилството.
„Разговараме со Русија. Би сакале да престанат“, им рече Трамп на новинарите од „Ер Форс 1“. „Не ми се допаѓа бомбардирањето, бомбардирањето продолжува и продолжува, а секоја недела илјадници млади луѓе се убиени“, рече Трамп.
ПРАШАЊЕ НА ДЕНОТ: Кој и зошто го блокира процесот на интеграција во ЕУ?
Патот на Северна Македонија кон Европската Унија е долг, сложен и често фрустрирачки за граѓаните, политичарите и дипломатите. Иако постои широка поддршка за членството во ЕУ како стратешка цел, процесот е постојано попречуван од политички, историски и национални прашања – како внатрешни, така и надворешни.
АЛ-ПРЕС
Редакциски избор од албански медиуми: Притвор за четворицата срби уапсени во Ѓаковица; Без нормализација нема движење кон ЕУ; Израел го одликува Рама со Претседателски орден на честа
СЛОБОДНА ЗОНА
„Во чекување што ќе донесат новите тарифи за земјите кои се на листата на Трамп и воопшто, за глобалната трговија и економија, светските берзи во меѓувреме се во постојан пад, што отвара простор за берзански мешетари, како што се Трамп и олигарсите – милионери во неговото блиско опкружување, да ловат во матно и да го зголемат своето берзанско портфолио, ако тоа не беше и вистинската цел за тие да се воведат.“, Драган Мишев во колумната „Тарифите на Трамп: Реакции, неизвесност и скриената агенда“.
„Кога ќе кажете „системот е виновен“, всушност, значи дека никој не е виновен, барем во првиот момент, додека не се соземе – самиот систем! Се работи за децениско алиби за одговорноста, една децениска пракса што премногу потсетува на кремљовските начини за манипулација со масите, само спроведен со примеси на локалните рецепти. И што погласно се напаѓа системот, толку потивко умира одговорноста. И човечноста.“, Џабир Дерала во колумната „Кога гласно се брани фотелјата, а тивко умира човечноста“.
Подготви: Д. Тахири
