ВЕСТ НА ДЕНОТ
Претседателката на ДКСК обвинета за одавање службена тајна во случајот „Адитив“
Основното јавно обвинителство за гонење на организиран криминал и корупција поднесе обвинителен предлог против претседателката на Државната комисија за спречување на корупцијата (ДКСК), Татјана Димитровска, која се сомничи дека во периодот од мај до декември 2024 година, на неповикано лице обвинето во предметот „Адитив“ му сторила достапни податоци кои се сметаат за службена тајна. Воедно, на Димитровска ѝ се става на товар и дека незаконски го добила сертификатот за класифицирани информации. Покрај Димитровска, обвинителството поднесе обвинителен предлог и против уште две лица. Меѓу нив е и раководителка на сектор во Подружница ТЕЦ Неготино АД ЕСМ Скопје, која во септември 2024 година, исто така, на неповикано лице му доставила податоци што се сметаат за службена тајна.
ИЗЈАВА НА ДЕНОТ
„Премиерот започна да го чита барањето ( кое целосно може да го прочитате во прилог) и изјави дека ќе се задржи само на петте точки, без да ги разгледува воведните делови и правните објаснувања. На првата точка – која се однесуваше на: “Еднократна парична помош за секое семејство погодено од трагедијата, за душевна болка и нематеријална штета, преку Фондот за итна поддршка од државниот буџет…”, добивме одговор кој не само што нè понижи, туку длабоко нè навреди како родители и како луѓе: „Ова барање е исто како предлогот на СДСМ, само што вие немате ставено цена. Одредете си цена за вашите деца.“Тоа беше моментот кога болката премина во чиста неправда. Овие зборови ќе одекнуваат засекогаш во нашите срца, како уште една смрт – смрт на достоинството. Јавен повик до премиерот и целата јавност: Доста е!, се вели во јавното обраќање на родителите на починатите деца во трагедијата во Кочани.
РЕГИОН
БиХ изгуби 108,5 милиони евра од ЕУ поради доцнење со реформската агенда
Европската комисија го информираше Советот на министри на Босна и Херцеговина дека оваа земја ќе добие 10 проценти помалку пари од Планот за раст за Западен Балкан, односно 108,5 милиони евра помалку, бидејќи не ја доставила конечната верзија на Агендата за реформи, дознава Радио Слободна Европа (RSE) од извор во Европската Унија.
СВЕТ
Европската Унија постигна договор за 18-ти пакет санкции против Русија
Европската Унија постигна договор за 18-ти пакет санкции против Русија поради нејзината војна во Украина, со низа мерки насочени кон нанесување дополнителни удари врз руската нафтена и енергетска индустрија. Нејзиниот најнов пакет санкции против Русија ќе ја намали ценовната граница на сурова нафта во Г7 на 47,6 долари за барел.
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
АНАЛИЗИ
„Во пресрет на локалните избори во октомври, државниот апарат повторно се користи како кадровски пазар за вдомување на партиски и блиски кадри. Повеќе од 730 активни огласи за вработување во јавниот сектор се појавија на страницата на Агенцијата за администрација, бројка што го надминува секој историски преседан. Ова е највисока бројка на објавени огласи за вработување од кога постои Агенцијата за администрација, предупредуваат од Синдикатот на работниците од управата, правосудните органи и здруженија на граѓани (УПОЗ), додавајќи дека ваквиот наплив на огласи е без преседан во пресрет на избори“, пишува Дестан Јунузи во „Избори пред врата, државната администрација како кадровски пазар“
Подготви: Б. Јордановска
