ВЕСТ НА ДЕНОТ
Претседателката на Државната комисија за спречување на корупцијата Татјана Димитровска утрово до Собранието ја доставила својата оставка. Кабинетот на претседателот на Собранието Африм Гаши информира дека Димитровска поднесла оставка од функција. Оттаму посочуваат дека Собранието ќе постапи согласно предвидените процедури.
Оставката треба да биде констатирана на една од наредните седници, по што треба да се состане Комисијата за прашања на изборите и именувања и да донесе одлука за распишување на јавен оглас за нов член на Антикорупциска комисија. Постапката за избор на нов член на ДКСК треба да започне најмногу десет дена откако Собранието ќе ја констатира оставката на Димитровска. Првата наредна седница на која би можело да се констатира оставката на Димитровска е закажана за вторник, 29 јули.
ИЗЈАВА НА ДЕНОТ
„Постапката за одговорност на јавниот обвинител на РСМ е уредена со Законот за јавното обвинителство и не предвидува можност за политичка одговорност каква што е интерпелацијата. Тоа е така за да се гарантира функцијата јавен обвинител кој раководи со единствен и самостоен орган, независен во постапувањето и одлучувањето. И покрај тоа, на интерпелацијата ѝ се дава третман како на секоја друга постапка за одговорност на политички функционер, што покажува недоволно разбирање на подносителите за самостојноста на третата власт, пишува државниот јавен обвинител Љупчо Коцевски во писмениот допис до пратениците кои поднесоа интерпелација против него, на дневен ред на собраниската седница на 29 јули.
РЕГИОН
Србија ќе го проширува граничниот премин кај Прешево, ќе има 23 ленти
Капацитетот на граничниот премин Прешево кон С. Македонија, еден од најпрометните гранични премини во Србија, наскоро би можел значително да се прошири, што ќе ги намали и метежот и времето на чекање. Тоа е предвидено во Просторниот план на Зоната за посебна намена на граничниот премин Прешево, даден на јавен увид.
СВЕТ
Преговарачите на Израел и САД вчера ги напуштија разговорите, при што Вашингтон го нарече Хамас „себичен“ и ја обвини групата дека „не дејствува со добра намера“. Палестинските претставници ја поздравија одлуката, но израелскиот премиер Бенјамин Нетанјаху вели дека таа „го наградува теророт“, а американскиот државен секретар Марко Рубио вели дека потегот е „неразумен“.
АЛ ПРЕС
Редакциски избор од албански медиуми: Косовските пратеници на последна седница за конституирање на собранието; Албанија доби нов Кривичен законик; Договорот за мигрантите со Албанија ја чини италијанската влада 114 илјади евра дневно
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
ЦИВИЛНИ АКТИВНОСТИ
Системското изгладнување во Газа е масовно кршење на меѓународното хуманитарно право – Светот мора да делува веднаш!
Гладот повеќе не е закана – туку сурова реалност, со бројни регистрирани смртни случаи од глад, вклучително и деца. Геноцидот доби ново лице – МАСОВНО ИЗГЛАДНУВАЊЕ, се наведува во соопштението на ЦИВИЛ.
ЦИВИЛ упати итно барање до меѓународната заедница и сите меѓународни институции за отворање на хуманитарни коридори за непречено доставување храна, вода и медицинска помош, гарантиран безбеден пристап за хуманитарните организации и нивните екипи на терен, престанок на сите напади врз цивилни цели, вклучувајќи болници, магацини за храна и центри за дистрибуција, мобилизирање на меѓународна хуманитарна поддршка и финансирање на организациите што делуваат на терен и притисок врз сите засегнати страни да го почитуваат меѓународното право, особено обврската за заштита на цивилното население.
СЛОБОДНА ЗОНА
„Во 2015 година, никој во Украина не мислеше дека некој судија може да заврши зад решетки. Во 2025 година, тоа стана норма. НАБУ и САПО се достигнувањата за кои луѓето загинаа во 2014 година, за време на Револуцијата на достоинството. Оние за кои луѓето се борат сега. Не за марионетскиот главен обвинител да стане крал на „правдата“, деактивирајќи ги главните државни тела за борба против корупцијата. Вие, владини претставници, продолжувате да мислите дека ќе можете да ја водите земјата без граѓанското општество“, пишува Олха Данилиук во „Предлог-закон #12414: План за саботирање на иднината на Украина“.
Подготви: Б. Јордановска
