ЦИВИЛ со осуда на криминалот и на политичкото профитерство во случајот „Онкологија“
ЦИВИЛ – Центар за слобода, како организација за човекови права и слободи, внимателно и со крајна загриженост го следи случајот „Онкологија“ кој го отворија истражувачките новинарки во „Фокус“ и „Слободен печат“. Во случајот постојат силни индиции за криминал и корупција со кој директно се загрозуваат здравјето и животот на пациентите, кои се основни човекови права.
Врз основа на обелоденетите сведоштва и факти, ЦИВИЛ изразува крајна осуда на криминалните активности насочени против здравјето и животот на луѓето.
По обелоденувањето, случајот „Онкологија“ предизвика бурна реакција и осуда, како од јавноста, така и од политичкиот врв на државата. Истовремено, надлежните институции јавно ветија дека ќе спроведат целосна истрага на случајот, а престапниците ќе ги изведат пред лицето на правдата.
Со оглед на индициите дека овој криминал се случувал многу долго време, ЦИВИЛ смета дека реакцијата е задоцнета, но во секој случај добредојдена ќе биде транспарентна и темелна истрага и најстроги законски санкции против сторителите, се наведува меѓу другото во соопштението од ЦИВИЛ.
ИЗЈАВА НА ДЕНОТ
Вархеји: Европската комисија планира да даде „суштински предлози“ во октомври
„Подготвени сме да излеземе дури и со храбри предлози – нови – и со нови идеи. „(Овој план) ќе ја забрза не само институционалната, туку и вистинската интеграција на тие земји во ЕУ. Тоа би вклучило сè, од реформи за владеење на правото, демократија, економски реформи и интеграција, подобрување на климата на инвеститорите и да ја обезбеди потребната финансиска поддршка за да се затвори јазот во развојот пред тие земји да станат членки. Ќе биде многу полесно да се интегрираат овие земји ако се многу поразвиени отколку сега и отколку во претходните случаи на проширување“, изјави комесарот за проширување Оливер Вархеји за „Еурактив“, додавајќи дека Европската комисија планира да даде „суштински предлози“ во октомври.
ВОЈНА ВО УКРАИНА
Демократија на руски начин: Кремљ се обидува да ги поништи изборите во сибирскиот регион по повлекувањето на неговиот кандидат поради страв од пораз
*
Претседателите на Турција и Русија на состанокот во Сочи не успеаја да се договорат за исполнување на условите од Москва на договорот за Црноморската иницијатива за жито и за продолжување на коридорот за жито.
*
Во селото Уљановка во привремено окупираната територија на Херсонската област, руските напаѓачи го принудуваат населението да „гласа“ на псевдоизбори под закана со оружје, објави движењето на отпорот „Жолта лента“ на Телеграм.
АНАЛИЗА
„Смртта на противникот на рускиот претседател Владимир Путин не е нешто ново во историјата на Русија. Повеќе од 20 критичари и противници на Путин се убиени или умреа во сомнителни околности од 2000 година наваму.“, пишува меѓу другото авторот Драган Мишев во анализата „ Смртта на Пригожин последна во серијата нерасчистени убиства во путиновата Русија, што е следно?“
ФЛЕШ ВЕСТИ
ПРАВДА Д-р Нино Васев обвинет за случај од 2019 година за пациент кој починал откако не бил навремено лекуван на Онкологија.
ПРОТЕСТИ Во петок , 8 септември, на датумот кога во 2021 година се случи катастрофалниот пожар во модуларната болница во Тетово, во кој живи изгореа 14 луѓе ќе има нов протест пред Основниот суд во Тетово.
ИНВЕСТИЦИИ Над 20 германски компании во Франкфурт ќе бидат запознаени со потенцијалите за инвестирање во Северна Македонија.
АЛ ПРЕС
Премиерот на Албанија, Еди Рама, вчера разреши шест министри и предложи нивни замени, со радикална промена на албанскиот владин кабинет во понеделник, во очекување на декретот на претседателот Бајрам Бегај. Косовските аналитичари излегоа со прогнози за наредната средба помеѓу косовскиот премиер Албин Курти и српскиот претседател Александар Вучиќ – дел од редакцискиот избор на ЦИВИЛ Медиа од албанските медиуми од регионот.
СЛОБОДНА ЗОНА
„Ако се сеќавате, Груевски дојде на власт во 2006 година со пропагандната порака со убедувањето дека во земјата ќе дојдат странски инвеститори. Аргумент за „атрактивноста“ на Македонија за странските инвеститори беше „евтината работна сила“ што може да ја понуди нашата земја.“, пишува Џабир Дерала во колумната „КОНТРАСТИ: Груевски нудеше „евтина работна сила“, сега се обезбедуваат „работни места со конкурентни плати“.
„Аферата со лековите во Онкологија во црвено-црната партија ја дочекаа и во улога на жртва (заедно, нели, со народот) и во улога на спасител кој ќе донесе „сеопшт идеален живот“ во сите сфери. И, како и секогаш, вистината за овој случај, со сите релевантни детали, не е важна, та нели живееме во општество на пост-вистината?“, Љубомир Костовски во колумната „Што се случува во гримиорната наречена „Христо Татарчев“.
„Неофашистите (т.н. левица), заедно со својата постара политичка сестра (вмродпмне) покажаа крајна дрскост и вулгарност и за свои, евтини цели, целосно ги киднапираа тагата и револтот на граѓанките и граѓаните од грозниот коруптивен скандал во Клиниката за Онкологија.“, ЕС-ПРЕССО од Џабир Дерала – БЕСЧУВСТВИТЕЛНИ И ВУЛГАРНИ ПОЛИТИЧКИ МОНСТРУМИ: Киднапирање на еден протест.
„Освен паролите со говор на омраза и вулгарните транспаренти, меѓу демонстрантите се појави и девојка облечена во народна носија и маска со обележја на познатата озлогласена, екстремно десничарска група Кју Анон, давајќи му на протестот уште една димензија, секако, во погрешен правец. Наместо да им се даде простор на граѓаните да си ги изразат своите незадоволства и револт пред институциите, протестот се сведе на „извонредна“ шанса за дел од опозицискиот блок партии да си ги „играат“ своите агенди на улиците.“, пишува Дијана Тахири во колумната „Што бара Кју Анон на протести?“.
„Аферата „онкологија“ ми изгледа како чир на телото на државата. Како болест која или ќе се лечи или ќе го убие организмот. Како катарза низ која заедницата мора да помине за да се осознае себеси за да почне да бара лек и оздравее.“, од Војо Маневски во колумната „Заматена вода“.
Подготви: Д. Тахири
