ВЕСТ НА ДЕНОТ
Вкупно 39 години затворски казни за случајот „Ласкарци“
Вкупно 39 години добија обвинетите во случајот „Ласкарци“ којшто се однесува на автобуската несреќа што се случи во 2019 година во која животот го загубија 16 патници, а над 30 беа повредени.
Судечкиот совет при Основниот Кривичен суд Скопје денеска го прогласи за виновен обвинетиот Дурмиш Белули, сопственик на компанијата „Дурмо турс“ и му изрече казна затвор од четири години, на одговорниот за транспорт во фирмата, Ремзи Мифтари казна затвор од шест години, а на тројцата вработени во станицата за технички преглед, Игор Ѓорѓиевски, Горан Дуковски и Јане Боваровски, кои се товарат за соучество во истото дело, им изрече затворска казна од по пет години.
Најголема казна затвор од 14 години доби возачот на автобусот, Маноил Трифуновски.
На обвинетите им беше изречена и забрана за вршење професија и должност во времетраење од пет години.
ИЗЈАВИ НА ДЕНОТ
Сарачини: Борбата против дезинформациите е борба за опстанок на медиумите
Институциите, граѓанскиот сектор, образованието и особено политичките актери да се вклучат во борбата против дезинформациите кои предизвикуваат говор на омраза. Политичките актери да водат битка на идеи и решенија, наместо битка на пропагандата и деструктивна поларизација, вели Петрит Сарачини, новинар и претседател на Институтот за медиуми и аналитика (ИМА), во серијалот на ЦИВИЛ насловен: „Ослободи го умот“ – посветен на борбата против дезинформациите, пропагандата и хибридните закани.
Дујовски: Дезинформациите имаат моќ да ги менуваат дури и стратешките концепти на развој на безбедносниот или кој било друг сектор во општеството
Најдобриот одговор на секоја лажна вест, или погрешна информација, е вистината, вели универзитетскиот професор Никола Дујовски, одговарајќи на прашањето кои се клучните елементи на борбата против дезинформациите, пропагандата и хибридните закани во Северна Македонија?, на панелот од серијата Ослободи го умот.
ВОЈНА ВО УКРАИНА
Кијив инсистира на меѓународна истрага за падот на рускиот Ил-76, додека Русија го користи падот на авионот за да сее незадоволство во Украина
ФЛЕШ ВЕСТИ
ОСТАВКА Премиерот Димитар Ковачевски претпладнево лично ја достави во Собранието неговата оставка, со што во оставка е целата Влада до изборот на техничката влада во недела на 28 јануари.
УСТАВЕН Според објавеното на веб страницата на Собранието, за судија на Уставниот суд е предложена Ана Павловска-Данева, професорка на Правниот факултет во Скопје.
Е-РЕГИСТАР Државната изборна комисија (ДИК) на својата веб-страница го објави Е-Регистарот на подзаконски акти. Од Комисијата појаснуваат дека на Е-Регистарот може да пристапи секој граѓанин кој сака да дознае како да го искористи своето право на глас, кандидат кој сака да се кандидира на следните избори и секоја заинтересирана организација или лице кои сакаат да го набљудуваат изборниот процес.
НОВА ВЛАДА Првиот вицепремиер и министер за политички систем Артан Груби потврди дека негов заменик за функцијата прв заменик на премиерот во преодната влада ќе биде вицепремиерот за европски прашања Бојан Маричиќ.
АЛ-ПРЕС
Редакциски избор од албанските медиуми во регионот.
Досја: Курти побара интегративен процес одвоен од дијалогот, ЕУ – Европскиот пат на Косово зависи од нормализацијата на односите со Србија
Зери: Продолжува судскиот процес против поранешните водачи на ОВК
Коха: Претседателот на Северна Македонија денеска е во посета на Косово
Топ Чанел: Специјалниот апелациски суд ја потврди одлуката за домашен притвор на Бериша
Сури- Европски центар: Албанија, на линијата на шверц на хероин од Авганистан преку Европа
КОЛУМНА – EO: Пропаднато општество со согласност и придонес на мнозинството
СЛОБОДНА ЗОНА
„Помалите (по обем) фашистички партии со смешни и лажни имиња се цицалчиња, пијат од отровното млеко на големата идеолошка биволица (партијата), чиј шеф е протагонистот на случајот Х. Тие се само нивна сенка, а некои дури се и „родени“ во морбидните лаборатории на грдата палата, под будното око на политички франкештајни од Истокот. Зошто да трошиме електронско мастило на нив? Знаеме од каде доаѓаат и каде тргнале.“, пишува Џабир Дерала во колумната „Меѓу европската иднина, опсесијата и тапанот на Путин“.
Подготви: Д. Тахири
