Советот на ЕУ усвои заклучоци насловени „Кон стратегијата на ЕУ за вештачката интелигенција во науката“, во кои се повикува на изработка на сеопфатна стратегија за поголемо искористување на вештачката интелигенција во науката, врз основа на етички, одржлив и инклузивен пристап насочен кон човекот.
– Вештачката интелигенција може целосно да ги трансформира научните откритија, да ги поттикне иновациите и да ја зголеми продуктивноста на нашите истражувачи, оцени полски министер за наука и високо образование Марчин Кулашек, чија земја е актуелен претседавач со ЕУ.
Според него, Европа мора брзо да ги искористи овие можности, но и да се справи со етичките и општествените предизвици и ризици од вештачката интелигенција, која се развива со забрзано темпо.
Во заклучоците се оценува дека забрзаниот развој на вештачката интелигенција и нејзината примена во научните истражувања, доведоа до револуционерни достигнувања, трансформирајќи го начинот на кој се практикува науката.
– Вештачката интелигенција се користи нашироко во анализата на податоци, симулациите и големите јазични модели, поттикнувајќи нови откритија и подобрувајќи ја ефикасноста на истражувањето, се вели во заклучоците, при што се нагласува улогата на вештачката интелигенција во справувањето со глобалните предизвици и подобрувањето на конкурентноста, општествените потреби и дигиталната транзиција во Европа.
Според документот, од тие причини соработката во областа на вештачката интелигенција е клучна за подобрување на научната размена, обезбедувањето интероперабилност и промовирање на одговорен развој на вештачката интелигенција.
Во стратегија се нагласува и потребата од одговорно и етичко користење на алатките за вештачка интелигенција во истражувањето и иновациите, со гарантирање на приватноста и интегритетот и безбедноста на податоците.
– Вклучувањето на вештачката интелигенција во науката, исто така, носи ризици како што се пристрасни алгоритми, манипулација со податоци и етички проблеми, што би можело да доведе до дезинформации или застој. За да се ублажат овие ризици, потребен е развој на критериуми за квалитет, упатства и најдобри практики за употреба на вештачката интелигенција во истражувањето, обезбедувајќи интегритет, транспарентност и репродуктивност на научната работа, се наведува во документот.
