ВЕСТ НА ДЕНОТ
По изгласаната недоверба, власта бара оставки од Дамева, Црвенковска, Мустафа, Чачарова – Илиевска и Адеми
Морална одговорност и напуштање на позициите очекува премиерот Христијан Мицкоски од петмината членови на Судскиот Совет, на кои им беше изгласана недоверба во Собранието. Заменик министерот за правда Ален Деребан, пак, го повика Судскиот совет итно да закаже седница и да расправа за заклучоците на Собранието, а членовите опфатени со интерпелациите да си поднесат оставки. Заменик – министерот за правда Деребан рече дека изгласаната интерпелација значи дека тие немаат легитимитет да земат учество, а уште помалку да одлучуваат во рамки на Советот. Изгласувањето на интерпелациите не значи оставки за овие пет члена на Судскиот совет, а за заминувањето од функциите на петте члена на Судскиот совет ќе треба да одлучат самите, како што налага Законот за Судски совет.
ИЗЈАВА НА ДЕНОТ
Анджеј Дуда: НАТО мора да биде храбар и решителен, веќе немаме време за дискусии, мора да дејствуваме сега
.„Денес НАТО мора да биде смел и решителен во своите постапки. Затоа, пред неколку дена поднесов официјално барање до генералниот секретар на НАТО, Марк Руте, да се зголемат трошоците за одбрана на минимум 3% од БДП од сите членки на НАТО, на претстојниот Самит во Хаг. Немаме повеќе време за дискусија. Ни треба одлука. Мора да дејствуваме сега“, рече полскиот претседател Анджеј Дуда на 26-годишнината од пристапувањето на Полска во НАТО.
РЕГИОН
Пратениците на собранието на Република Српска изгласаа одлука за усвојување нов Устав, ОБСЕ смета дека со тоа се крши уставниот поредок на Босна и Херцеговина
Народното собрание на Република Српска синоќа усвои предлог-одлука за пристапување кон усвојување нов Устав на Република Српска. ОБСЕ соопштение во врска со неколку закони и мерки усвоени од Народното собрание на Република Српска на 27 февруари и кои влегуваат во сила на 6 март, а кои го оспоруваат уставниот поредок на Босна и Херцеговина: Неодамнешното усвојување на сет закони и мерки во Народното собрание на Република Српска, кои забрануваат работа на судските и безбедносни институции на Босна и Херцеговина на територијата на Република Српска и нивното влегување во сила, го крши уставниот поредок на Босна и Херцеговина и ја загрозува стабилноста и единството на земјата.
СВЕТ
Францускиот парламент усвои резолуција со која се повикува на запленување на руски имот
По неколкучасовна дебата, Долниот дом на францускиот Парламент усвои резолуција за зајакнување на поддршката за Украина, вклучително и повик за запленување на рускиот имот. Текстот на резолуцијата, усвоен со 288 гласа „за“ и 54 „против“, има суштинска симболична вредност. Против гласаа само пратениците на екстремно левичарската партија Неосвоена Франција (ЛФИ), додека Националниот собир (РН) и умерената десничарска партија „Републиканци“ беа воздржани.
ПРАШАЊЕ НА ДЕНОТ: Што мислите за надворешната политика на владата на Мицкоски?
ИНТЕРВЈУА
Андријаускас: Не можеме да бидеме бранители на човекови права само во нашето општество и да ги занемариме злоупотребите на човековите права во Русија и другите авторитарни режими
Штајнакер: Постои јаз помеѓу убавите разговори, одржливоста, Зелениот договор и реалноста на теренот
Ресман: Треба да се бориме за слободата на демократските медиуми, и да ја поддржиме Украина и украинското новинарство во време на војна
ДЕЗИНФОРМАЦИИ
„На Фејсбук се шири лажна вест злоупотребувајќи го името на премиерот Христијан Мицкоски и името на министерот за економија Бесар Дурмиши за да ги измами корисници на социјалните мрежи со цел да ми земат пари од нивните сметки. За таа намена се злоупотребува логото на веб-страницата на телевизијата Канал 5 и имиња на новинари за да се помисли дека се работи за вистинска вест за да ги намамат следбениците да кликнат“, пишува ЦМТ во „Внимание, нов бран измама: Лажно интервју на Канал 5 со Мицкоски и Дурмиши за да им ги „олеснат“ банкарските сметки на граѓаните“.
Подготви: Б. Јордановска
