ВЕСТ НА ДЕНОТ
Помина во Брисел извештајот на Вајц за Северна Македонија
Комитетот за надворешни работи (АФЕТ) на Европскиот парламент денеска со 40 гласови „за“, 19 „против“ и 10 „воздржани“ го усвои Предлог-извештајот за земјава подготвен од австрискиот европратеник Томас Вајц.
Пратеничката група на Европската народна партија претходно поднесе амандман по скратена постапка за вметнување на зборот „современ“ пред македонски јазик и идентитет во Извештајот, но согласно Деловникот за работа, тој не беше ставен на гласање затоа што против таквиот предлог се изјаснија најмалку шест пратеници членови на АФЕТ. На гласањето му претходеше нервозна атмосфера која се почувствува и во обраќањето на претседавачот на АФЕТ, Мекалистер, кој нагласи веднаш дека еднаш лани не бил усвоен извештај за Македонија и дека се надева дека тој ќе помине денес – бидејќи на ЕП и треба позиција за ова прашање од Парламентот.
ИЗЈАВА НА ДЕНОТ
Вајц: Северна Македонија заслужува да биде дел од ЕУ – мора да го задржиме позитивниот замав
Горди сме на целокупната работа и напорите што беа вложени во постигнување компромиси, со што успеавме да донесеме избалансиран извештај, поддржан од политичкото мнозинство. Северна Македонија припаѓа во ЕУ. По 20 години преговори, мора да го задржиме сегашниот позитивен замав и да продолжиме со унапредување на процесот на проширување“, изјави Томас Вајц по усвојување на Извештајот за Северна Македонија, прв по 2022, што тој го подготви, како известувач од земјата.
РЕГИОН
Вучиќ го запре извозот на воена опрема по руските обвинувања
Србија го запре целиот извоз на муниција во екот на израелско-иранскиот конфликт и честите критики од Москва за Украина. На прашањето дали со извозот на муниција во Израел, Србија избрала страна во израелско-иранскиот конфликт, претседателот Александар Вучиќ одговори: „Сега не извезуваме ништо“, јавуваат српските медиуми.
СВЕТ
Израел се согласи на прекин на огнот со Иран, Трамп ги замоли двете земји да не го кршат
Претседателот на САД, Доналд Трамп, вели дека прекинот на огнот меѓу Израел и Иран „сега е на сила“ и им кажува на двете земји: „Ве молам, не го кршете!“ Неколку часа по објавата на Трамп, израелската влада потврдува дека се согласува со прекинот на огнот и предупредува дека „ќе одговори енергично на секое кршење“ Иран претходно изјави дека ќе ги запре нападите само ако Израел го стори истото.
ПРАШАЊЕ НА ДЕНОТ: Што мислите за Парадата на гордоста во Скопје?
АНАЛИЗИ
„И додека на Парада на гордоста ја даваат поддршката за Газа, со која раководи Хамас, не е лошо да се иинформираат каков третман во Газа имаат геј луѓето. Години наназад извештаите на групите за човекови права посочуваат на праксата на палестинската самоуправа во Газа и Хамас рутински да ги мачат активистите за човекови права, жените, ЛГБТК+ лицата, и политичките противници.. Скопје Прајд не е изолиран случај. Од нападот на Хамас врз Израел на 7 октомври 2023 година, голем дел од организираната ЛГБТК+ заедница, која историски добиваше поддршка од еврејската заедница, застана на страна на пропалестинска антиизраелска активност. Евреите и поддржувачите на Израел беа изолирани од ЛГБТК+ заедницата иако, почнувајќи со движењето за граѓански права од 1950-тите и 1960-тите, тие беа длабоко вклучени во активизмот и им даваа поддршка на организациите што ги унапредуваат правата на ЛГБТК+ луѓето, жените, расната еднаквост и репродуктивната слобода“, пишува Драган Мишев во анализата „Како Скопје Прајд стана квази левичарска, про-палестинска подружница“.
Подготви: Б. Јордановска
