Честитки за формирање на новата Влада којашто, синоќа пред полноќ, беше изгласана во Собранието на Република Македонија, пристигнаа од Високата претставничка за надворешна и безбедносна политика на Европската унија, Федерика Могерини, пд еврокомесарот за проширување на ЕУ, Јоханес Хан, од американскиот амбасадор во Македонија Џес Бејли и од Стејт Департментот.
„Ние го поздравуваме гласањето за новата Влада предводена од премиерот Зоран Заев. Европската унија е подготвена да ја поддржи работата што новата Влада, како и опозицијата, ќе ја прават за конструктивно да се имплементираат сите делови од Договорот од Пржино и Итните реформски приоритети. Очекуваме сите парламентарни партии да ги остават нивните поделби настрана во моментов, и од почеток да работат заеднички на доставување на заедничка реформска агенда која ќе биде од корист на земјата во целост. Ова е, исто така, од суштинско значење за да се врати земјата на својот пат кон европската интеграција, процес кој граѓаните јасно го сакаат и го заслужуваат“, стои во заедничкото соопштение на Могерини и на Хан.
Тие очекуваат Владата на премиерот Зоран Заев и опозицијата, да изготват заедничка програма за реформска агенда која ќе биде од корист за Република Македонија.
Амбасадата на САД во Македонија и амбасадорот Џес Бејли му го честитаа изборот за премиер на Зоран Заев и изборот на нова Влада.
„САД им честита на премиерот Зоран Заев и на парламентарното мнозинство за формирањето на нова влада во Македонија. Како пријател и партнер на Македонија, САД со нетрпение очекува да работи со новата Влада за исполнување на евроатлантските аспирации на земјата за спроведување на итните реформи со кои ќе се зајакне владеењето на правото и независноста на судството, слободата на медиумите, и отчетноста на Владата“, пишува во објавата.
Честитки пристигнаа и од Стејт Департментот.
„Соединетите Американски Држави им честитаат на премиерот Зоран Заев и на мнозинството во Собранието на формирањето нова Влада на Македонија. Како пријател и партнер на Македонија, САД ќе соработуваат со новата Влада во нејзината работа кон исполнување на евроатланските аспирации со имплементирање на итните реформи, засилување на владеењето на правото, независноста на судството, слободата на медиумите и одговорноста на Владата“, изјави портпаролката, Хедер Наурт.
