„Тетово во минатото имал многу зеленило, паркови, дури и градскиот плоштад тогаш беше еден од многуте паркови. Сега во Тетово, со новите урбанистички (не)планови немаме ниту еден парк. За жал, и по 5 години немаме урбанистички план и сè помалку зелени површини има во градот. Белите дробови на Тетово и Скопје, како што многу урбанисти ја нарекуваат Шар планина, место да се негуваат и чуваат, се предмет на дивокрадци каде бесрамно се сече шумата. Од друга страна Шара преставува и една од најбитните ресурси за развој на економијата и туризмот. Имаме еден масив што започнува од Маврово па завршува кај Љуботен што насегаде во светот би бил искористен за развој на туризмот, планинарство. За жал, ние не само што ништо досега не сме направиле, туку и она малку што се направи не е како што треба и не функционира“, изјави граѓанскиот активист и соработник на ЦИВИЛ од Тетово, Перо Наумовски. со кого разговаравме за зелените вредности.
Екологистите од Тетово постојано апелираат да се реши конечно проблемот со ски центарот Попова Шапка и целиот масив на Шар Планина со долгорочно планирање. Како што вели Наумовски, апсурдот лежи во отпорот на локалните власти на иницијативите на екологистите да се прогласи Шар Планина за национален парк.
„Нема нови пошумувања, нема нови паркови, напротив и тоа што го има со урбаната мафија и со условите какви што се општината и државата, дополнително се уништува“, разочарано појаснува Наумовски.
„Своја одговорност има и државата, а голем дел од надлежностите се и на локалната самоуправа. Многу влијае и сè уште нерасчистените односи во пренесувањето на ингеренции од државно на локално ниво. Можеби ќе помогне доколку сите општини што гравитираат во Полошкиот плански регион се вклучат во зеднички проекти за екологија, развој на туризмот, земјоделието и сè она што е природен ресурс. Проблемот го лоцирам кај сите носители на власта, но криви сме и ние самите, граѓаните. Еколошката свест треба да почне од образовнаието. А за условите во нашето образование не сакам ни да зборувам“, потенцираше Наумовски.
Перо Наумовски, како долгогодишен поддржувач и член на ЦИВИЛ, присуствуваше и на инфо-штандот во Тетово каде се промовираше проектот „Зелена иднина“, а во директна комуникација со граѓанките и граѓаните разговаравме за зелените вредности, социјалната правда и антинационализмот.
Биљана Јордановска
Камера и фотографија: Ариан Мехмети
