ЦИВИЛ започнува со новата серија на регионални семинари, а во тек е и пријавувањето на заинтерсираните за првиот што ќе се одржи во Штип. Семинарот носи наслов „Граѓански објектив: Граѓан(к)ите учествуваат, набљудуваат и известуваат“, и претставува своевиден континуитет на семинарите што ЦИВИЛ ги организираше изминатите четири години, а на кои учествуваа близу илјада граѓанки и граѓани од сите краишта на Северна Македонија.
Новата серија на регионални семинари се во многу нешта различни од претходните триесетина вакви настани. Тие се уште подинамични и обработуваат богатство од теми што се соодветни на општествено-политичките состојби и процеси во земјата. Во секој случај, се работи за континуитет, бидејќи ЦИВИЛ останува и понатаму посветен на јакнење на граѓанското учество, активизмот и граѓанското новинарство со кои се промовираат транспарентни и одговорни политички процеси што ќе се одржуваат низ целата држава. Семинарите се дел од проектот Граѓански објектив: Промовирање на транспарентни и одговорни политички процеси, финансиран од National Endowment for Democracy, што ЦИВИЛ го имплементира веќе петта година по ред.
Првиот од вкупно 8 семинари ќе се одржи во Штип на 28 септември (сабота), во хотел Оаза со почеток во 10 часот. Повикот за учество на семинарот трае до 25 септември (среда).
На семинарот може да се пријават сите заинтересирани граѓанки и граѓани од општините во Источниот плански регион: Берово: Виница, Делчево, Зрновци, Карбинци, Кочани, Македонска Каменица, Пехчево, Пробиштип, Чешиново-Облешево и Штип.
Според информациите, семинарите на ЦИВИЛ во новата сезона ќе бидат извонредно интензивни, а една од главните цели е да им помогнат на учесничките и учесниците да се стекнат со практични знаења за мониторингот, објективното и навремено информирање и известување, со користење на придобивките од новите медиуми, комуникациски технологии и платформи. На семинарите ќе биде посветено и посебно внимание на темите како: транспарентност и одговорност, говор на омраза, лажни вести и корупција, како и на заштитата на човековите права и слободи.
„Ни претстои турбулентен период, на граѓан(к)ите им нудиме информации, знаења и вештини за учество, активизам и мониторинг. Од друга страна, луѓето немаат време за бескрајни предавања. Светот брзо се менува. Мораме, не само да бидеме подготвени за тие промени, туку да бидеме дел од нив. Семинарите на ЦИВИЛ се можност да споделиме вредни искуства, но и да се запознаеме со потенцијални соработници во идните проекти.“ – велат од ЦИВИЛ.
ЦИВИЛ Тим за комуникации
РЕСУРСИ ЗА ПОДГОТОВКА НА УЧЕСНИЧКИТЕ И УЧЕСНИЦИТЕ НА СЕМИНАРИТЕ НА ЦИВИЛ
