Бугарија не го одржа зборот. Не се придржува кон договореното на високо ниво на неодамнешната средба во Берлин, под покровителство на германската канцеларка Ангела Меркел. Австрискиот новинар Кристијан Фердинанд Вершиц денеска на својот профил го откри нон-пејперот на кој бугарската страна се согласила. По очигледниот (и заслужен) дипломатски триумф на македонската страна во Берлин, Бугарија ретерира и се заканува со блокада на почетокот на пристапните преговори меѓу ЕУ и Северна Македонија!
Новинарот Вершиц со остар тон ја критикува официјална Софија, дека се обидува да најде најразлични оправданија.
„Софија ова го оправдува историски; ова вклучува дека Скопје треба да признае дека корените на македонскиот јазик се бугарски дијалект; покрај тоа, Северна Македонија треба да признае еден од своите херои како Бугарин и исто така да отстрани натписи во кои Бугарија се нарекува окупаторска сила во Втората светска војна“ – пишува Вершиц на својот профил и понатаму ексклузивно открива дека минатата недела во Берлин на состанокот со кој претседаваше германската канцеларка Ангела Меркел, на кој присуствуваа бугарскиот министер за надворешни работи и двајца министри од Скопје бил договорен нон-пејпер со сосема поинаква содржина од позициите на Бугарија по тој состанок.
Што содржи нон-пејперот на кој се согласила бугарската страна? Еве што пишува новинарот Вершиц:
– Во преговарачка рамка да стои чисто македонски јазик, без фусноти, објаснувања и астерикси
– Немаме проблем на ЕУ да им кажеме дека краткото и долгото име се истозначни, и дека литературниот МК јазик е кодификуван во 1945 година
– Нема разговори и компромиси поврзани со идентитетот и јазикот. Тие прашања се затворени по Преспа, и бетонирани во УН.
Повеќе од очигледно е дека македонската политика е препознаена како добрососедска и конструктивна. Сите во ЕУ, германското претседателство и ЕУ институциите се принципиелни и го почитуваат нашето право на самоопределување. Бугарија е изолирана и работи на штета на сите, на себе, на нас и на цела ЕУ.
Според овој нон-пејпер, но и според расположението во Германија и воопшто во ЕУ, ништо од бугарските барања не е признаено и уважено. Едноставно, македонската позиција е поддржана силно и недвосмислено – нема бугарски корени на идентитетот и јазикот.
Македонската страна во овој бесмислен конфликт што го наметна бугарската политика, е цврста и непоколеблива: нашата земја води политика со која покажува и докажува дека сме посветени на Договорот за пријателство од 2017 година, посветени сме на регионалната соработка и го потврдуваме немешањето во внатрешните работи. Но, тоа значи и целосно заштитени идентитет и чиста употреба на македонскиот јазик, нешто за кое не станува збор во преговарачката рамка.
Едно е јасно. Бугарските државни претставници се изолирани и неодговорни. Единствено на што можат да се повикаат е нивното право на унилатерална изјава, но никако да го кршат консензусот во ЕУ кој е веќе изграден и во кој е препознаена македонската држава како сериозна и одговорна страна.
